४० अंकले बढ्यो नेप्से, निफ्राको मात्रै साढे ४४ करोडको सेयर कारोबार

काठमाडौँः नेपाल स्टक एक्स्चेन्ज (नेप्से)मा सूचीकृत कम्पनीहरूको लाभांशको आशमा सेयर बजारमा पसेका लगानीकर्ता सेयर बेचेर बाहिरिने क्रम बढेपछि ओरालो लागेको सेयर बजारमा सोमबार पुनः सुधार देखिएको छ । 

सोमबार सेयर बजार परिसूचक, नेप्से ४०.६४ अंकले बढेर २,५१५.०३ बिन्दूमा पुगेको छ । ‘क’ वर्गका कम्पनीहरूको सेयर मूल्य मापन हुने ‘सेन्सेटीभ इण्डेक्स’ १.४५ प्रतिशत अर्थात् ६.४७ अंकले बढेको छ । आइतबार चार महिना यताकै भारी गिरावट आएको सेयर बजारमा आज सबै समूहका परिसूचक हरियाली भएको छ । ट्रेडिङ समूहको परिसूचक सबैभन्दा उच्च ३.३२ प्रतिशतले बढेको छ । त्यस्तै होटल र टुरिजम समूहको परिसूचक पनि २.७१ प्रतिशतले बढेको छ भने वित्त कम्पनी समूहको परिसूचक २.०४ प्रतिशतले बढेको छ । 

---

नेपाल इन्फ्रास्ट्रक्चर बैंक (निफ्रा)को समेत सेयर सूचीकृत रहेको अन्य समूहको परिसूचक १.३८ प्रतिशतले बढेको छ । 

आज सेयर बजारमा सबैभन्दा ठूलो सेयर कारोबार निफ्राकै भएको छ । कारोबार, कारोबार संख्या र कारोबारको आकार तीनै हिसाबले निफ्राको सेयर कारोबार सबैभन्दा धेरै छ । निफ्राको सेयरमा गत साता निकै ठूलो उतारचढाव देखिएको थियो । सोमबार निफ्राको सेयर मूल्य ४.१३ प्रतिशतले बढेर अन्तिम कारोबार मूल्य ५२९ रुपैयाँ कायम भएको छ । 

सोमबार निफ्राको मात्रै ४४ करोड ४८ लाख ५२ हजार ६ सय ४७ रुपैयाँको सेयर कारोबार भएको छ । निफ्रापछि ठूलो कारोबार भएका कम्पनीहरूमा शिखर इन्स्योरेन्स, ग्लोबल आइएमइ बैंक, नेपाल बैंक लिमिटेड तथा नेपाल लाइफ इन्स्योरेन्स कम्पनी रहेका छन् । 

आज बढी कमाउनेमा चन्द्रागिरि हिल्स रहेको छ । चन्द्रागिरी हिल्सको सेयर मूल्य ९.९० प्रतिशत बढेर अन्तिम कारोबार मूल्य ४५५ रुपैयाँ कायम भयो । त्यस्तै कर्पोरेट डेभलपमेन्ट बैंक तथा बरुण हाइड्रोपावरको सेयर मूल्य क्रमशः ८.१२ र ६.७९ प्रतिशतले बढेको छ । गुहेश्वरी मर्चेन्ट बैंक एण्ड फाइनान्स र आशा लघुवित्तको सेयर मूल्य पनि ६ प्रतिशतभन्दा माथि उकालो लागेको छ । 

सेयर बजारमा अत्याधिक खरिद वा बिक्रीको चाप हुँदा दैनिक कारोबार १० अर्ब रुपैयाँको कारोबार नाघेकोमा सोमबारको कारोबार औसत देखिएको छ । सोमबार नेप्सेमा २०९ कम्पनीको ५ अर्ब ६९ करोड २३ लाख १६ हजार आठ सय ३१ रुपैयाँ मूल्यका १ करोड १८ लाख ३८ हजार चार सय ८८ कित्ता सेयर ७० हजार तीन सय ३९ कारोबारमार्फत् खरिद–बिक्री भएको छ ।