वेस्ट ह्याममाथि आर्सनलको शानदार जित

काठमाडौँ- इंग्लिस प्रिमियर लिग अन्तर्गत शीर्षस्थानको आर्सनलले वेस्ट ह्याम युनाइटेडमाथि शानदार जित हात पारेको छ । सोमबार राति भएको खेलमा आर्सनलले वेस्ट ह्यामलाई ३-१ गोल अन्तरले पराजित गरेको हो ।

आर्सनललाई जित दिलाउन बुकायो साका, गाब्रिएल मार्टिनेली र एडी नकेटियाहले एक-एक गोल गरे ।

---

साइद बेनराहमाले २७ औँ मिनेटमा पेनाल्टीमार्फत वेस्ट ह्यामलाई अग्रता दिलाएका थिए । आर्सनलका विलियम सालिबाले वेस्ट ह्यामका जारोड बावेनमाथि पेनाल्टी बक्सभित्र फाउल गरेपछि वेस्ट ह्यामले पेनाल्टी पाएको थियो ।

वेस्ट ह्यामले पेनाल्टीमार्फत अग्रता लिएपनि आर्सनलले दोस्रो हाफमा तीन गोल गर्‍यो । साकाले ५३ औँ मिनेटमा गोल गर्दै खेललाई बराबरीमा पुर्‍याए भने मार्टिनेलीले ५८ औँ तथा नकेटियाहले ६९ औँ मिनेटमा गोल गर्दै आर्सनललाई जित दिलाए ।

जितसँगै आर्सनलले १५ खेलबाट ४० अंक जोडेको छ । यता १६ खेलबाट ३३ अंक जोडेको न्यूकासल दोस्रो तथा १४ खेलबाट ३२ अंक जोडेको म्यानचेस्टर सिटी तेस्रो स्थानमा छ ।