बर्नमाउथमाथि युनाइटेडको शानदार जित

काठमाडौँ- इंग्लिस प्रिमियर लिग फुटबलअन्तर्गत म्यानचेस्टर युनाइटेडले बर्नमाउथमाथि शानदार जित हात पारेको छ । मंगलबार राति भएको खेलमा युनाइटेडले बर्नमाउथलाई ३-० गोलअन्तरले पराजित गरेको हो ।

युनाइटेडलाई जित दिलाउन कासेमिरो, ल्युक शाँ तथा मार्कस रासफोर्डले एक-एक गोल गरे । कासेमिरोले २३औँ मिनेटमा गोल गर्दै युनाइटेडलाई अग्रता दिलाए ।

---

ल्युकले ४९औँ मिनेटमा अग्रता दोब्बर बनाए भने रासफोर्डले ८६ औँ मिनेटमा गोल गर्दै युनाइटेडको जित सुनिश्चित गरे ।

जितसँगै युनाइटेडले १७ खेलबाट ३५ अंक जोड्दै चौथो स्थानमा यथावत रहेको छ । उसले पाँचौ स्थानको टोटेनहम (३० अंक) सँगको दूरी ५ अंकमा पुर्‍याएको छ ।

बर्नमाउथ भने १८ खेलबाट १६ अंक जोड्दै १५ औँ स्थानमा छ ।