रियल मड्रिड कोपा डेल रेको सेमिफाइनलमा

काठमाडौँ- रियल मड्रिड स्पेनिस कोपा डेल रे फुटबलको सेमिफाइनलमा प्रवेश गरेको छ । शुक्रबार बिहान भएको क्वार्टरफाइनल खेलमा एटलेटिको मड्रिडलाई ३-१ गोलअन्तरले पराजित गर्दै रियल मड्रिड अन्तिम चारमा प्रवेश गरेको हो ।

रियल मड्रिडलाई जित दिलाउन रोड्रिगो, करिब बेन्जेमा र भिनिसियस जुनिएरले एक-एक गोल गरे । एटलेटिको मड्रिडका लागि अल्भारो मोराटाले एक गोल फर्काए ।

---

मोराटाले १९ औँ मिनेटमा गोल गर्दै एटलेटिकोलाई अग्रता दिलाएका थिए तर रियलका रोड्रिगोले ७९औँ मिनेटमा बराबरी गोल फर्काए ।

निर्धारित ९० मिनेटमा दुबै टोलीले बराबरी खेलेपछि थप गरिएको ३० मिनेटमा रियलले दुई गोल गर्‍यो । एटलेटिकोका स्टेफाइन साभिक ९९औँ मिनेटमा रातो कार्ड खाँदै बाहिरिएपछि रियलका बेन्जेमाले १०४ औँ तथा भिनिसियसले अतिरिक्त समयको दोस्रो हाफको इन्जुरी समयमा गोल गरे ।