एनआरटी र आर्मीको रोमाञ्चक बराबरी, मछिन्द्र अझै जितविहिन

काठमाडौँ- सहिद स्मारक ‘ए’ डिभिजन फुटबल लिगअन्तर्गत न्यूरोड टिम (एनआरटी) र त्रिभुवन आर्मी फुटबल क्लबले अंक बाडेका छन् । च्यासल मैदानमा आइतबार भएको खेलमा एनआरटी र आर्मीले ३-३ गोलको बराबरी खेलेका हुन् ।

एनआरटीका लागि लालनुन्जामाले २ तथा जुन एन्सियन्टले एक गोल गरे । आर्मीका लागि नवयुग श्रेष्ठ, सुदिल राई र दिनेश हेन्जनले एक-एक गोल गरे ।

---

नवयुगले १५ औँ मिनेटमा पेनाल्टीमार्फत गोल गर्दै आर्मीलाई अग्रता दिलाएपनि एनआरटीका लालनुन्जामाले ५१ औँ मिनेटमा बराबरी गोल गरे । एन्सियन्टले ५६ औँ मिनेटमा पेनाल्टीमार्फत गोल गर्दै एनआरटीलाई २-१ को अग्रता दिलाउँदा लालनुन्जामले ६० औँ मिनेटमा अर्को गोल थपे ।

तर आर्मीका सुदिलले ६७ औँ मिनेटमा गोल आर्मीलाई पुनः खेलमा फर्काए । त्यसपछि आर्मीका दिनेश हेन्जनले ८० औँ मिनेटमा गोल गर्दै खेललाई बराबरीमा पुर्‍याए।

यससँगै अघिल्ला २ खेल हारेको एनआरटीले पहिलो अंक जोडेको छ । आर्मीले भने एक जित्दा २ खेलमा अंक बाडेको छ ।

यसैबीच, च्यासल मैदानमा भएको खेलमा साविक विजेता मछिन्द्र फुटबल क्लबले भने मनाङ मर्स्याङ्दी क्लबसँग गोलरहित बराबरी खेल्यो । अघिल्ला २ खेलमा पराजित भएको मछिन्द्रले पहिलो अंक जोडेको छ । यता मनाङले भने एक खेल जित्दा दुई खेलमा अंक बाडेको छ ।