अफिजले ५ गोल गर्दा खुमलटारमाथि मछिन्द्रको जित

काठमाडौँ- सहिद स्मारक ‘ए’ डिभिजन फुटबल लिगअन्तर्गत साविक विजेता मछिन्द्र फुटबल क्लबले एफसी खुमलटारमाथि शानदार जित हात पारेको छ । च्यासल मैदानमा आज भएको खेलमा मछिन्द्रले खुमलटारलाई ७-३ गोलअन्तरले पराजित गर्‍यो ।

मछिन्द्रलाई जित दिलाउन अफिज ओलावालेले ५ तथा विजय भुजेल र विमल घर्तीमगरले १-१ गोल गरे । खुमलटारका लागि मेसुके ओलुमोउले २ तथा स्टेफान समिरले एक गोल गरे ।

---

जारी लिगमा ह्याट्रिक पूरा गर्ने अफिल पहिलो खेलाडी बनेका छन् ।

जितसँगै मछिन्द्रले ८ खेलबाट १२ अंक जोडेर छैटौ स्थानमा उक्लिएको छ । खुमलटारको भने ८ खेलमा ७ अंक छ ।

अर्को खेलमा त्रिभुवन आर्मी फुटबल क्लबले जावलाखेल युथ क्लबलाई ३-१ ले पराजित गर्‍यो । आर्मीको जितमा जिलेस्पी जंग कार्की, नवयुग श्रेष्ठ र सुदिल राईले एक-एक गोल गरे । जावलाखेलका लागि सुनिल खड्काले एक गोल फर्काए ।

जितसँगै आर्मीले ८ खेलबाट १२ अंक जोडेर गोलअन्तरमा मछिन्द्रलाई पछि पार्दै पाँचौ स्थानमा उक्लिएको छ ।  जावलाखेलको १४ अंकसहित दोस्रो स्थानमा छ ।