‘फिलिपिन्ससँगको मैत्रीपूर्ण खेल साफ च्याम्पियनसीपको तयारीका लागि पनि हुने’

काठमाडौँ- नेपाली राष्ट्रिय फुटबल टिमले आगामी जुन १५ मा फिलिपिन्ससँग मैत्रीपूर्ण फुटबल खेल्दै छ । नेपालले फिफा डे अन्तर्गत हुने मैत्रीपूर्ण फुटबलका लागि नेपालले फिलिपिन्सको भ्रमण गर्ने छ ।

फिलिपिन्सविरुद्धको मैत्रीपूर्ण खेल नेपालका लागि भारतमा हुने साफ च्याम्पियनसीप फुटबलको तयारीको रुपमा समेत रहनेछ ।

---

अखिल नेपाल फुटबल संघ (एन्फा) का महासचिव किरण राईले फिलिपिन्ससँगको मैत्रीपूर्ण खेल साफ च्याम्पियनसीपका लागि पनि हुने बताए । ‘फिलिपिन्सविरुद्धको मैत्रीपूर्ण खेल साफ च्याम्पियनसीपको तयारीको रुपमा समेत रहेको छ,’ महासचिव राईले भने । उनले फिलिपिन्सबाहेक अन्य देशसँग अहिले कुनै खेल हुने तालिका भने नरहेको समेत बताए ।

भारतले जुन २१ देखि जुलाई ३ सम्म बेंग्लुरुमा साफ च्याम्पियनसीप आयोजना गर्दैछ । साफ च्याम्पियनसीपमा साफ बाहिरको टोली कुवेतले पनि सहभागिता जनाउने सुनिश्चित भएको छ ।

साफ च्याम्पियनसीपमा कुवेत र भारतसँगै नेपाल, बंगलादेश, पाकिस्तान, माल्दिभ्स र भुटानको पनि सहभागिता रहनेछ ।