ए डिभिजन लिग : मनाङ र संकटाले अंक बाँडे

काठमाडौं– शहीद स्मारक ए डिभिजन लिग अन्तर्गत बिहीबार भएको अर्को खेलमा सर्वाधिक ८ पटकको लिग च्याम्पियन मनाङ मस्र्याङ्दीले संकटा क्लबसँग समान २–२ को बराबरी खेल्यो ।  च्यासल मैदानमा सम्पन्न खेलमा अग्रता जोगाउन नसक्दा मनाङ अंक बाँड्न बाध्य बनेको हो । बराबरीसँगै मनाङले १९ खेलमा २३ अंक जोडेको छ । संकटाको पनि समान खेलबाट २३ अंक नै छ ।

मनाङका लागि दुवै गोल टिमोथी कोफी कुन्डोले गर्दा संकटाका लागि युसेफ एट्रिस र मनिष डाँगीले समान एक गोल गरेका थिए । खेलको १९औं मिनेटमा कुन्डोको गोलमार्फत मनाङले अग्रता लिएको खेलमा  ४४ औं मिनेटमा एट्रिसले संकटालाई बराबरीमा फर्काएका थिए । ४५औं मिनेटमा कुन्डाले ब्यक्तिगत दोस्रो गोल गर्दा मनाङ पहिलो हाफमा २–१ को अग्रता बनाएको थियो ।

---

दोस्रो हाफको ५२ औं मिनेटमा मनिषले गोल गर्दै संकटालाई २–२ को बराबरीमा ल्याए । बाँकी समयमा दुवै टोली थप गोलका लागि प्रयास गरे पनि गोल हुन सकेन र दुवैले अंक बाँडे । मनाङ लिगमा संकटाविरुद्ध अपराजित रह्यो । पहिलो लेगमा मनाङ १–० ले विजयी भएको थियो ।