म्यानचेस्टर युनाइटेडले च्याम्पियन्स लिग खेल्ने पक्का

काठमाडौँ- म्यानचेस्टर युनाइटेडले युरोपियन च्याम्पियन्स लिग खेल्ने पक्का भएको छ । इंग्लिस प्रिमियर लिग फुटबलअन्तर्गत बिहीबार राति चेल्सीलाई पराजित गर्दै युनाइटेडले च्याम्पियन्स लिगमा स्थान पक्का गरेको  छ ।

लिग विजेता म्यानचेस्टर सिटी, दोस्रो स्थानको आर्सनल र चौँथो स्थानको न्यूकासलले यसअघि नै च्याम्पियन्स लिगमा स्थान सुरक्षित गरिसकेका थिए । यता चेल्सीको पराजयसँगै लिभरपुलले भने युरोपा लिग खेल्ने भएको छ ।

---

बिहीबार राति युनाइटेडले चेल्सीलाई ४-१ गोलअन्तरले पराजित गर्‍यो । युनाइटेडलाई जित दिलाउन कासेमिरो, एन्थनी मार्सल, ब्रुनो फर्नान्डेज र मार्कस रासफोर्डले एक-एक गोल गरे । चेल्सीका लागि जोआओ फेलिक्सले एक गोल फर्काए ।

जितसँगै युनाइटेडले ३७ खेलबाट ७२ अंक जोडेको छ । पाचौँ स्थानमा रहेको लिभरपुलको भने ६६ अंक छ । चौँथो स्थानको न्यूकासलले ७० अंक जोडेको छ ।

प्रिमियर लिगको अन्तिम चरणका खेलहरु आइतबार हुने तालिका रहेको छ ।