चेल्सीका एन'गोलो कान्टे साउदी क्लब अल-इतिहादमा आबद्ध

काठमाडौँ- साउदी अरेबियन क्लब अल-इतिहादले युरोपमा खेल्दै आएका अर्को खेलाडी भित्र्याएको छ । साउदी प्रो लिग विजेता अल-इतिहादले इंग्लिस क्लब चेल्सीबाट खेल्दै आएका एन'गोलो कान्टेलाई तीन वर्षको लागि क्लबमा भित्र्याएको स्काई स्पोर्ट्सले जनाएको छ ।

३२ वर्षीय फ्रान्सेली मिडफिल्डलर कान्टेले सात वर्षपछि चेल्सी छोडेका हुन् । फ्रान्सकै अर्का खेलाडी करिम बेन्जेमा पनि यसै महिनाको सुरुवातमा अल-इतिहादमै आबद्ध भएका थिए ।

---

चेल्सीमा रहँदा कान्टेले प्रिमियर लिग, एफए कप, च्याम्पियन्स लिग, युरोपा लिग र यूईएफए सुपर कप जितेका थिए । कान्टेले फ्रान्सबाट २०१८ को विश्वकप र इंग्लिस क्लब लेस्टर सिटीबाट प्रिमियर लिग पनि जितेका छन् ।

चेल्सीकै अर्का खेलाडी हाकिम जियेच पनि साउदी क्लब अल-नासरबाट खेल्ने कुरा चल्दै छ । इटालियन पत्रकार फाब्रिजियो रोमानोका अनुसार अल-नासर र जियेचबीच मौखिक सम्झौता भईसकेको छ ।