बार्सिलोनाका पूर्व कप्तान बुस्केट्स मेस्सीसँगै मियामीमा

काठमाडौँ- स्पेनिस फुटबल क्लब बार्सिलोनाका ३४ वर्षीय पूर्व कप्तान सर्जियो बुस्केट्सले लियोनल मेस्सीसँग अमेरिकी क्लब इन्टर मियामीबाट खेल्ने भएका छन् । बुस्केट्सले साउदी अरेबियन क्लबबाट आएको आकर्षक प्रस्ताव अस्वीकार गर्दै मियामी जान लागेका हुन् । 

मेस्सी र बुस्केट्सले बार्सिलोनामा १३ वर्षमा ५६७ खेल सँगै खेलेका थिए । 

---

मियामीले आफ्नो सामाजिक सञ्जालमा स्पेनको पूर्व अन्तर्राष्ट्रिय मिडफिल्डरको आगमनको घोषणा गरेको हो । स्पेनका लागि बुस्केट्सले १४३ खेल खेल्दा सन् २०१० को विश्वकप र सन् २०१२ को युरो कप जिताउन महत्वपूर्ण भूमिका निर्वाह गरेका थिए ।

बुस्केट्सले बार्सिलोनाका लागि भने ७२२ खेल खेल्दै तीन च्याम्पियन्स लिग र नौ ला लिगाको उपाधि जिते । उनले बार्सिलोनामा १८ वर्ष बिताएपछि गत मे महिनामा ला लिगा च्याम्पियन बार्सिलोना छाड्ने घोषणा गरेका थिए ।