इन्टर मिलानका ब्रोजोभिक साउदी क्लब अल-नासरमा

काठमाडौँ- साउदी अरेबियन क्लब अल-नासरले क्रोएसियाका मिडफिल्डर मार्सेलो ब्रोजोभिकलाई इन्टर मिलानबाट १८ मिलियन युरोमा अनुबन्ध गरेको छ ।

अल-नासर र ३० वर्षीय ब्रोजोभिकबीच जुन २०२६ सम्मका लागि सम्झौता भएको हो ।

---

सन् २०१५ मा डायनामो जाग्रेबबाट 'लोनमा' इन्टर आइपुगेका उनले पछिल्ला आठ वर्ष इटालीमा बिताएका थिए ।

ब्रोजोभिकले इन्टरबाट ३३० खेल खेल्दै ३१ गोल गर्दा, एक पटक सिरी ए र दुई पटक कोपा इटालियाको उपाधि उचाले ।

ब्रोजोभिकले अल-नासरमा पूर्व म्यानचेस्टर युनाइटेडका स्ट्राइकर क्रिस्टियानो रोनाल्डोसँग खेल्नेछन् । साउदी अरेबियामा पछिल्लो समय युरोपबाट भित्रिने खेलाडीमा उनी थपिएका अर्का खेलाडी हुन् ।

रियल मड्रिडका करिम बेन्जेमा, चेल्सीका एन'गोलो कान्टे, कालिडोउ काउलिबेली र एडवार्ड मेन्डी साउदी अरेबियन क्लबहरुमा यसै वर्ष भित्रिसकेका छन् ।