इन्टर मियामीमा नयाँ चुनौतीको सामना गर्न मेस्सी उत्सुक

काठमाडौँ- अर्जेन्टिनी फुटबल स्टार लियोनल मेस्सीले अमेरिकी क्लब इन्टर मियामीमा आवद्ध भएकोमा पछुतो नलागेको बताएका छन् ।

मेस्सीले अमेरिकी क्लबमा नयाँ चुनौतीको सामना गर्न उत्सुक रहेको समेत बताएका रोयटर्सले उल्लेख गरेको छ ।

---

फ्रेन्च क्लब पेरिस सेन्ट जर्मेन (पीएसजी) छाडेर मियामीमा आवद्ध भएका ३६ वर्षीय मेस्सीले मंगलबार एक टेलिभिजनलाई दिएको अन्तर्वार्ताका क्रममा अमेरिकी क्लबमा नयाँ चुनौतीको सामना गर्न उत्सुक रहेको बताएका हुन् ।

‘हामीले लिएको निर्णयप्रति म खुसी छु । म नयाँ चुनौतीको सामना गर्न तयार र उत्सुक छु,’ मेस्सीले भने ।

मियामीले विशेष समारोहबीच मेस्सीलाई आइतबार सार्वजनिक गर्ने तयारी गरेको छ । सात पटकका बालोन डी’ओर विजेता मेस्सीलाई फर्ट लाउडरडेलस्थित डिआरभी पिएनके स्टेडियममा सार्वजनिक गरिनेछ । उनीसँगै बार्सिलाेनाका पूर्व कप्तान सर्जियाे बुस्केट्सलाई पनि सार्वजनिक गरिँदैछ ।