व्यक्तिगत स्वार्थमा डुबेको प्रतिष्ठानलाई आन्दोलनले निकास दिन्छ : उपकुलपति गिरी

काठमाडौँ : वीपी कोइराला स्वास्थ्य विज्ञान प्रतिष्ठानका उपकुलपति प्रा. डा ज्ञानेन्द्र गिरीले व्यक्तिगत स्वार्थमा लिप्त प्रवृत्तिका व्यक्तिहरूले बुनेको माकुराको जालोबाट निकास दिन विद्यमान आन्दोलनले सहयोग गर्ने बताएका छन् ।

गिरीले बुधबार विज्ञप्ति जारी गर्दै प्रतिष्ठानलाई माया र न्यायोचित निष्ठाप्रति उच्च सम्मान गर्ने बताए । 'तपाइहरूको साथ, सहयोग र हाल भइरहेको यस आन्दोलनको बलमा एकताबद्ध भइ देशकै गौरव र प्रतिष्ठा बोकेको यस प्रतिष्ठानको विगतको इतिहास, विद्यमान उचाइ र भविष्यमा अझ उचाइको नयाँ शिखरमा पुग्‍ने विश्‍वास लिएको छु,' उनले जारी गरेको विज्ञप्तिमा उल्लेख छ ।

---

कुनै पनि प्रकारको कमिकमजोरी भएको भए त्यस्ता कार्यको संवैधानिक अख्तियारवाला निकायलाई छानबिन गरी सत्य तथ्य पत्ता लगाउन सहयोग गर्ने डा. गिरीको भनाइ छ । दोषी करार भएमा कानुन बमोजिम कारबाही भोग्न तयार हुने पनि उनले उल्लेख गरेका छन् ।

आर्थिक, नीतिगत र कोभिडसम्बन्धी कार्यका लागि विभिन्न सरकारी निकायमा सहयोगका लागि काठमाडौँमा रहेको उनले बताएका छन् । १५ गतेको वार्तामा आन्दोलनरत पक्षले उठाएका मागहरू जायज रहेको प्रतिक्रिया उनको छ । 

'प्रतिष्‍ठानको विकास र सुन्दर  भविष्यको जिजिविषा बनेका तपाइहरूको यस अभियानलाई स्वागत गर्दछु,' उनले विज्ञप्तिमा लेखेका छन्,'राष्ट्रप्रतिको कर्तव्य अनि नयाँ युगको सपना देखे, स्वास्थ्य क्षेत्रको संवेदनशीलता प्रति गहिरो, अटुट अनि अटल निष्‍ठा देखे ।'