खोप लगाएकाबाट पनि सर्न सक्छ 'डेल्टा भेरिएन्ट'

काठमाडौँ-कोभिड–१९ महामारीका कारण विश्वभर करिब ४० लाखभन्दा बढीले ज्यान गुमाइसकेका छन् । खोप कार्यक्रम अघि बढिरहे पनि कोभिड महामारी नियन्त्रणमा आइसकेको छैन । त्यसमाथि झन् कोभिडको नयाँ भेरिएन्ट, 'डेल्टा'को प्रभाव पनि थपिएको छ । 

पछिल्लो समय 'डेल्टा'को असर व्यापक हुँदै गएपछि यसबारेमा अध्ययन पनि भइरहेको छ । बेलायतको पब्लिक हेल्थ इंग्ल्यान्ड (पीएचई)ले पनि डेल्टामाथि अनुसन्धान गरेको छ । उसको प्रारम्भिक निचोड छ, खोप लगाइसकेका व्यक्तिबाट पनि खोप नलगाएका व्यक्तिबाट जसरी नै डेल्टा सर्नसक्छ । गत साता अमेरिकाको सेन्टर्स फर डिजिज कन्ट्रोलले पनि डेल्टाका विषयमा यस्तै धारणा सार्वजनिक गरेको थियो । 

---

‘सुरुवाती खोजका अनुसार डेल्टा भेरिएन्टबाट संक्रमित तर खोप लगाइसकेका र खोप नलगाएका संक्रमितमा भाइरसको स्तर समान हुने देखिएको छ । तर यस विषयमा अझैँ अध्ययन भइरहेको छ,’ पीएचईले विज्ञप्ती जारी गर्दै भनेको छ ।

पीएचईका अनुसार जुलाई १९ यता अस्पताल भर्ना भएका डेल्टाद्वारा संक्रमित बेलायतीमध्ये ५५.१ प्रतिशतले खोप नलगाएको र ३४.९ प्रतिशतले भने दुवै डोज खोप लगाएको पाइएको छ । बेलायतमा झन्डै ७५ प्रतिशतले खोप लगाइसकेका छन् । 

बेलायती तथा अमेरिकी वैज्ञानिकहरुले डेल्टाको प्रभावका विषयमा अध्ययन गरिरहे पनि उनीहरुको खोजीमा समावेश गरिएका नमूना संकलनको आकार सानो छ । यसैबीच कोलम्बियामा फेला परेको बी.१.६२१ नाम गरेको नयाँ भेरिएन्टका बारेमा पनि अनुसन्धान भइरहेको पीएचईले जनाएको छ । बेलायतमा मात्रै ३७ जना यो भेरिएन्टबाट संक्रमित भइसकेका छन् । रोयटर्सबाट