गाभीले उपलब्ध गराउने फाइजर खोप कात्तिकमा आउने

काठमाडौँ- कात्तिकको पहिलो सातासम्ममा एलायन्स फर गाभीले अनुदानस्वरुप उपलब्ध गराउने फाइजर खोप नेपाल आइपुग्ने भएको छ । गाभीले एक लाख डोज खोप उपलब्ध गराउने प्रतिवद्धता जनाएको परिवार कल्याण महाशाखाका प्रमुख डा. तारानाथ पोखरेलले जानकारी दिए ।

'खोप आयात उपलब्ध गराउने हामीलाई आश्वासन प्राप्त गरिसकेका छौं,' पोखरेलले भने,'खोप राख्‍न गाभीले फ्रिजसमेत उपलब्ध गराउने भएको छ । नेपालले पनि आवश्यक भण्डारणको तयारी गरिरहेको छ ।'

---

फाइजर खोप माइनस ७० डिग्री तापक्रममा भण्डारण गर्नुपर्ने हुन्छ। हालसम्म उक्त खोपका लागि भण्डारण केन्द्रको स्थापना गरिएको छैन । सरकारले फाइजर खोप बालबालिकालाई लगाउने घोषणा गरिसकेको छ ।

नेपालमा हालसम्म तीन कम्पनीको मात्र खोप लगाइएको छ । चीनको भेरोसेल खोप, भारतको कोभिसिल्ड र अमेरिकाको जोनसन एण्ड जोनसन खोप लगाइएको छ ।

औषधि व्यवस्था विभागले आपतकालीन प्रयोगका लागि भारतको सिरम इन्स्च्युटबाट उत्पादित कोभिसिल्ड, चीनबाट सिनोफार्मको भेरोसेल, भारतबायोटेकको कोभ्याक्सिन र  रसियन कम्पनी 'स्पुटनीक भि'ले आपतकालीन प्रयोगका अनुमति पाइसकेका छन् । 

भारतबाट अनुदानस्वरुप प्राप्त १० कोभिसिल्ड खोप नेपालमा गत वर्षको माघ १४ गतेदेखि लगाउन थालिएको थियो । अहिलेसम्म पहिलो र दोस्रो डोज खोप लगाउनेको संख्या करिब एक करोड पुगिसकेको छ । हालसम्म एक करोड १३  लाख ९४ हजार कोभिडविरुद्धको खोप भित्रिएको छ ।

चीनबाट भेरोसेल खोप अनुदानस्वरुप १८ लाख, खरिद गरी ४० लाख । भारतबाट कोभिसिल्ड खोप ११ लाख अनुदानस्वरुप र खरिद गरी १० लाख । भुटानबाट २ लाख ३० हजार, अमेरिकाबाट जोनसन एण्ड जोनसन १५ लाख ३४ हजार, बेलायतबाट १ लाख ३० हजार र जापानबाट अनुदानस्वरुप १६ लाख खोप अनुदान स्वरुप ल्याइएको हो ।