नेपालभित्र हवाई यात्रा गर्ने ९५ प्रतिशतले खोप लगाए

काठमाडौँ- आन्तरिक उडान भर्ने ९५ प्रतिशत यात्रुहरुले कोभिडविरुद्धको खोप लगाइसकेका छन् । बुद्ध एयरले उडान गरेको एक सर्वेक्षण अनुसार अधिकांश यात्रुहरुले कोभिडविरुद्धको खोप लगाईसकेका छन् । एक हजार ८९५ यात्रुहरूमाथि गरिएको सर्वेक्षणमा एक हजार ७९३ जना यात्रुहरूले खोप लगाइसकेका छन् । ९५ प्रतिशत यात्रुले कोभिडविरुद्धको खोप लगाइसकेका छन् ।

बुद्ध एयरका प्रवन्ध निर्देशक वीरेन्द्र बहादुर बस्नेतले आफूहरूले पूर्ण सावधानीका साथ निरन्तर सेवा प्रवाह गरेको बताए । ‘पहिलोपटक संक्रमण हुँदा उडान बन्द भएपछि हामीलाई पनि त्रास थियो । जानकारी थिएन । यसमा अध्ययन भएको थिएन,' उनले भने,' हामीले यसअघि दुईपटक उडान बन्द पनि गरेका छौं । तर, अब त्यसरी हुँदैन । हामीसँग तथ्यांक पनि छ । अब हामीसँग अनुभव पनि भएको छ । पूर्ण सावधानीका साथ हामी हवाईसेवा सञ्चालन गरिरहेका छौं ।’ 

---

पहिलो लकडाउनको समयमा बुद्ध एयरले कोरोनाविरुद्ध निर्देशिका बनाएर महिनौं पूर्वअभ्याससमेत गरेको थियो । आफ्ना सबै कर्मचारीलाई विश्व स्वास्थ्य संगठन तथा नागरिक उड्डयन प्राधिकरणको निर्देशिका अनुसार सम्पूर्ण सुरक्षाका उपायका अपनाएर पिपिई, मास्क तथा तालिम प्रदान गरेको थियो ।

एयरका सम्पूर्ण कर्मचारीले पूर्ण मात्रामा खोप लगाइसकेका छन् । संक्रमणरहित सरसफाईका लागि फग मेशिन, अन्तर्राष्ट्रिय मापदण्ड अनुसारका केमिकलको प्रयोग निरन्तर भइरहेको बस्नेतले बताए । उनले हरेक उडानपूर्व जहाजको सरसफाईलाई अनिवार्य गरिएको बताए।

हवाई उडान संक्रमणरहित रहेको उनले बताए । एटीआर जहाजमा प्रत्येक तीन मिनेटमा पुरानो हावा विस्थापित हुँदै स्वच्छ हावा प्रवाह हुने गरेको छ । हावाको वहाव संक्रमणरहित हुने गरेको एटीआर कम्पनीले पुष्टि गरिसकेको छ ।

बस्नेतले बुद्ध एयरमा यात्रा गर्ने यात्रुले ढुक्क भएर यात्रा गर्न पाउने दाबी गरे । ‘हाम्रो उडान संक्रमणरहित छ, यहाँहरू ढुक्कका साथ उडान गर्नसक्नुहुन्छ’, उनले भने।त्यसैगरि यात्रुहरुले पनि कोभिडविरुद्धको प्रोटोकलअनुसार सहयोग गर्नुपर्ने उनको भनाइ छ ।  यात्रुले सुरक्षा चेकजाँचदेखि ब्यागेज नबुझेसम्म यात्रा अवधिभर मास्कको अनिवार्य प्रयोग गर्नुपर्छ । एयरले गरेको सर्भेक्षण नतिजा हरेक साता प्रकाशित गर्ने जनाएको छ ।