आफ्नै घरकाे आँगनमा मृत भेटिए युवक, हत्याकाे आशंका

कैलाली- कैलालीको गोदावरी नगरपालिका १२ ओलानीमा एक युवक मृत अवस्थामा फेला परेका छन् । आफ्नै घर अगाडि आँगनमा सोही ठाउँका मदनबहादुर बडेला (२५/२६) मृत फेला परेका हुन् । 

मंगलबार साँझ करिब ५ बजेतिर घरबाट निस्किएका बडेला आज बिहान पौने छ बजेतिर घोप्टो परेको अवस्थामा आफ्नै घर अगाडि मृत फेला परेको प्रहरीले जानकारी दिएको छ । 

---

जिल्ला प्रहरी कार्यालय कैलालीका प्रमुख प्रहरी उपरीक्षक सोमेन्द्र सिंह राठौरले बडेलालाई आफ्नै घरको आँगनमा घोप्टो परेर लडेको अवस्थामा मृतककी आमाले देखेपछि प्रहरीलाई खबर गरेको बताए । उनले मृतक बडेलाको टाउको र खुट्टामा चोट देखिएको बताउँदै शवलाई पोस्टमार्टमका लागि सेती प्रादेशिक अस्पताल धनगढी पठाइएको उल्लेख गरे । 

घटनाबारे अनुसन्धान सुरु गरिएको बताउँदै प्रहरी उपरीक्षक राठौरले केही व्यक्तिहरूसँग सोधपुछ भैरहेको जानकारी दिए ।