कर्णालीमा दोस्रो गैरसरकारी विधेक दर्ता

सुर्खेत– कर्णाली प्रदेशसभा सचिवालयमा ‘कर्णाली नव–प्रवर्तन, अन्वेषण तथा आविष्कार प्रतिष्ठान विधेयक, २०७८’ दर्ता गरिएको छ । नव–प्रवर्तन, अन्वेषण तथा आविष्कार प्रतिष्ठान सञ्चालनका लागि पूर्व मन्त्री एवंम् प्रदेश सभा सदस्य नरेश भण्डारीले गैरसरकारी विधेयक दर्ता गरेका हुन् ।

परम्परागत रुपमा गर्दै आएका कामलाई विज्ञान प्रविधिको प्रयोग मार्फत युग परिवर्तन गर्न विधेयक दर्ता गरिएको भण्डारीले जानकारी दिए । ‘अब्वल मस्तिष्क भएका व्यक्तिको पहिचान गरी वैज्ञानिक एवं प्राविधिक जनशक्तिलाई परिचालन, प्रोत्साहन र कदर गर्ने र उनीहरुबाट विज्ञान तथा प्रविधि क्षेत्रमा नव–प्रवर्तन, अन्वेषण तथा आविष्कार गराउन यो विधेयक आवश्यक भएको हो ।’

---

विज्ञान तथा प्रविधि क्षेत्रमा नव–प्रवर्तन, अन्वेषण तथा आविष्कार गर्दै प्रतिभाशाली वैज्ञानिक एवं प्राविधिक जनशक्तिलाई परिचालन, प्रोत्साहन र कदर गरी आर्थिक समृद्धियुक्त खुशी समाज निर्माण गर्ने उद्देश्यले विधेयक दर्ता गरिएको भण्डारीले बताए । 

यो कर्णाली प्रदेशमा पेश भएका गैरसरकारी विधेयकमध्ये दोस्रो हो । यसअघि पहिलो विधयेकको रुपमा सांसद भण्डारीले नै सिंजा सभ्यतासम्बन्धी विधयेक संसदमा पेश गरेका थिए । संसदको भूमिकालाई प्रभावकारी बनाउनुका साथै सांसदको भूमिका ‘हुन्छ’ र ‘हुन्न’ भन्नेमा सीमित नरही विधेयक निर्माण गर्ने हो भन्ने सन्देश दिन खोजिएकोले पनि गैरसरकारी विधयेक दर्ता गरिएको भण्डारीले बताए । 

विधेयक कार्यान्वयन भएपश्चात् यसबाट नयाँ वैज्ञानिकको खोज गरी सरकारले उनीहरुको योजना खरिद गर्ने छ । खोज अनुसन्धानका लागि सरकारले उनिहरुलाई व्याज अनुदानमार्फत ऋण लगानी गर्ने छ ।