फिचर

दुई वर्षअघि ट्रायथलनमा हाफ बनेका आलोक नेपालकै पहिलो 'फुल आइरन म्यान'

संसारकै कठिन मानिने खेल १३ घण्टा ४७ मिनेटमा पूरा

अतिन आचार्य |
असार १३, २०७९ सोमवार १५:१७ बजे

काठमाडौँनेपालका आलोक खत्री जर्मनको फ्रयांकफर्टमा भएको ट्रायथलनमा सहभागी भइ 'फुल आइरन म्यान' भएका छन् । काठमाडौँ बुढानिलकण्ठ नगरपालिकाका आलोकले ३ दशमलव ८६ किलोमिटर पौडी, ४२ दशमलव २ किलोमिटर र १८० दशमलव २ किलोमिटर दूरी साइकलमा पार गरेका हुन् ।

खेल समयावधि अघि  उनले  आफ्नो खेल पूरा गरेका थिए । उक्त खेलको पूरा समय १५ घण्टा हुने गर्छ । खत्री नेपालको पहिलो 'आइरन म्यान'को रुपमा परिचित छन् । सन् २०१९ मा ट्रायथलन मलेसियामा उनी सहभागी भएर 'हाफ आइरन म्यान' भएका थिए । यसपटक भने उनी 'फुल' आइरन म्यान भएका छन् ।


३१ वर्षीय खत्री यसपटक जर्मनमा भएको पूरा ट्रायलथानमा पनि सहभागी भए । उनले सम्पूर्ण रेस हिजो मात्र पार लगाएका हुन् ।

उनले तीन वटै खेल १३ घण्टा ४१ मिनेट ५७ सेकेण्डमा पूरा गरेका थिए । पौडी १ घण्टा ३३ मिनेट १४ सेकेण्ड, साइकल रेसिङ ६ घण्टा ३६ मिनेट १५ सेकेण्ड र ५ घण्टा १२ मिनेट ४४ सेकेण्डमा दौड पूरा गरे । यो खेललाई संसारकै कठिन खेल मान्ने गरिन्छ । एकै दिनमा तीनै खेल खेल्नुपर्ने हुन्छ ।

आलोकले भारत र अमेरिकाका प्रशिक्षकसँग अनलाइनबाट तालिम लिने गरेका थिए । भारत र नेपालका प्रशिक्षकसँग उनले नौ महिनासम्म तालिम लिएका थिए । साइकल रेसिङमा उनले आफ्नै साइकल प्रयोग गरेका थिए । उनले नेपालबाट साइकल लिएर गएका थिए ।

उनले प्रयोग गर्ने साइकलका लागि भने नेपालको सडक संरचना राम्रो नभएको बताइएको । समय-समयमा साइकल पन्चर भइरहँदा प्रशिक्षणका क्रममा उनलाई कठिन भएको थियो ।  यसपटकको 'फुल आइरन म्यान' खेलमा विश्वभरका पाँच हजार खेलाडी सहभागी भएका थिए ।

सन् १९७८ मा आइरन म्यान' खेल पहिलोपटक अमेरिकामा भएको थियो । अमेरिकी नौ सेना कमाण्डर जोन कोभिन्स र उनको श्रीमतीले सुरु गरेका थिए । पहिलो कार्यक्रममा अमेरिकाको हवाईमा १५ जना खेलाडीहरूको सहभागिता रहेको थियो । त्यसबेलादेखि 'एनिथिङ इज पोसिबल' नारासहित मानवको बाधा हटाउन यो खेल सुरु भएको हो । ​


Author

अतिन आचार्य

वैदेशिक रोजगार, जन-स्वास्थ्य र सामाजिक मामलामा कलम चलाउँने आचार्य संवाददाता हुन् ।


थप समाचार
x