अमेरिका पुरानै लयमा फर्कियो : राष्ट्रपति वाइडन

काठमाडौँ : राष्ट्रपति जो वाइडनले अमेरिका पुनः आफ्नै लयमा फर्केको बताएका छन् । उनले अघिल्लो चारवर्षे कार्यकालाई केही पनि नभनी अमेरिका पुनः लयमा फर्केको बताउँदै आमनागरिकलाई ऊर्जा थप्‍ने काम गरेका छन् । उनको यो घोषणाले हरेक अमेरिकीमा आशा देखिएको त्यहाँका सञ्‍चार माध्यमहरूको विश्लेषण छ ।

उनले पटक-पटक भने, 'अब अमेरिकाले गति लियो र अघि बढ्नेछ । अमेरिकाले विश्‍व नेतृत्व गर्ने नै छ ।' कोभिडको महामारीबाट सिर्जित विपदलाई अमेरिकाले सुल्झाउन लागेको र यसअघिका राष्ट्रपति डोनाल्ड ट्रम्पकै कारण निम्तिएको अस्थिरता समाप्त भएको पनि बताए । यो विषयलाई अमेरिकी सञ्‍चार माध्यमले प्रमुखताको साथ छापेका छन् ।  

---

ट्रम्पको कार्यकालमा पुगेको क्षतिलाई उल्ट्याएर अन्तर्राष्ट्रिय साझेदारीलाई आफ्नो विदेश नीतिले पुनः सम्बोधन गर्दै अघि बढेको पनि उनले बताए । अमेरिकी राष्ट्रपति भएपछि अमेरिकी संसद्को दुवै सदनलाई संयुक्त रुपमा सम्बोधन गर्दै वाइडनले अन्य विविध प्रयासहरूसँगै कोभिड-१९ विरुद्धको व्यापक खोप अभियानको सफलताको प्रशंसासमेत उनले गरेका थिए ।

खोप कार्यक्रमले जनतामा उत्साह बढेको र सक्रिय भएका भन्दै उनले भने, ‘कोभिड प्रभावित अमेरिकी मध्यमवर्गको उत्थान र अमेरिकी श्रमिक वर्गलाई  पुनर्जीवन दिन खर्बौं डलरको आर्थिक प्याकेज आवश्यक छ ।’ अमेरिका अब आफ्नो कदम निर्धक्कले अघि बढाउन सक्छ । काम गर्ने र नयाँ नयाँ सपना देख्‍ने तहमा पुनः अमेरिका फर्केको छ ।

विश्वलाई नै यस्ता विषयमा पहिले झै सबल नेतृत्व दिएर अघि बढ्न हामी तयार रहेको जानकारीसमेत उनले सदनमा दिए । उनले आफ्नो कार्यकालको सय दिनको समीक्षासमेत गरेका थिए । उनले खोपको सफलताको खुलेर प्रशंसा गर्दै यो अभियानले अमेरिका तंग्रिएको र नेतृत्व गर्दै अघि बढेको बताए ।

दोस्रो विश्वयुद्ध पछिको विश्वमा अमेरिकाले जुन स्तरको भूमिका निर्वाह गर्दै आएको थियो त्यसमा अझ सुधार गर्दै उत्तिकै बलियो ढंगले अघि बढाउने पनि बताए । रोजगारी योजनामा रहेका विमतिलाई हटाएर समानतामा ध्यान केन्द्रित गर्ने उनको धारणा पनि प्रशंसाको एक पाटो बनेको छ ।  

यसअघि झै श्रमिकलाई वेवास्ता गर्ने र माथिल्लोलाई मात्र ध्यान दिने काम अब हुँदैन । सबैलाई समान व्यवहार गरिने उनले बताए । आफूलाई पछि छाडिएको र बिर्सिएको अनुभूति कसैले गर्न पाउने छैनन् आगामी दिनमा उनले भने । अमेरिकाका आउटसोर्स गर्नेलाई पनि अवसर दिने र आफ्नालाई जोड दिने बताए ।