प्रमुख समाचार

राष्ट्रिय सभा उपनिर्वाचन : तीन सय मतदातामा २९२ मत खस्यो

विक्रम खड्का |
जेठ १७, २०७८ सोमवार १३:३ बजे

बुटवल : लुम्बिनी प्रदेशमा राष्ट्रिय सभा सदस्य चयनका मतदान जारी छ । घोराहिस्थित कर्मचारी मिलन केन्द्रमा बिहान ९ बजेबाट मतदान सुरू भएको हो । मतदान दिउँसो ३ बजेसम्महुनेछ । आज नै नतिजा घोषणा हुनेछ ।

बिहान १२:३० बजेसम्म २९२ मत खसेको छ । जसमध्य स्थानीय तहतर्फ १८८ मत खसेको छ । प्रदेशसभातर्फ ८० मत खसेको छ । त्यस्तै कोभिड-१९ केन्द्रमा २४ मत खसेको छ । लुम्बिनीमा कुल तीन सय मतदाता छन् । जसमध्य नेपालगञ्‍ज उपमहानगरपालिकाका मेयर डा. धवलशम्शेर राणाले राष्ट्रियसभा सदस्यको उपनिर्वाचन बहिष्‍कार गर्ने घोषणा गरिसकेका छन् ।


उपनिर्वाचनमा सत्तारुढ नेकपा एमालेका चन्द्रबहादुर खड्का र नेपाली कांग्रेससहितको गठबन्धनका दृगनारायण पाण्डे चुनावी मैदानमा छन् । पाण्डेलाई नेकपा माओवादी केन्द्र, जसपा उपेन्द्र पक्ष, राष्ट्रिय जनमोर्चाको समर्थन छ ।

प्रदेश सभा सदस्यका ८३ र स्थानीय तहका प्रमुख, उपप्रमुख, अध्यक्ष, उपाध्यक्ष गरी २१७ जना गरी जम्मा ३ सय जनाले मतदान गर्न पाउनेछन् । निर्वाचनको अघिल्लो दिन निर्वाचन आयोगले मतदाता नामावलीमा चार जनाको नाम थपेको थियो । जनता समाजवादी पार्टीका चार जना प्रदेश सभा सदस्यले निर्वाचनमा मतदान गर्न पाउने छन् ।

राष्ट्रिय सभा उपनिर्वाचनमा प्रदेश सभातर्फ ७९ जना मतदाता कायम भएकोमा निर्वाचन आयोगको जेठ १६ गते बसेको बैठकले चार जना प्रदेश सभा सदस्यको नाम पुरक मतदाता नामावलीमा समावेश गरेको हो । सन्तोषकुमार पाण्डे, विजयबहादुर यादव, सुमन शर्मा रायमाझी, कल्पना पाण्डेले मतदान गर्न पाउने भएका हुन् । यता निर्वाचन आयोगले गरेको निर्णयको विरोध गठबन्धनले गरेको छ ।

राष्ट्रियसभा निर्वाचनमा प्रदेशसभा सदस्यको मतभार ४८ र स्थानीय तहका प्रमुख/उपप्रमुखको मतभार १८ हुन्छ । लुम्बिनीमा एमाले र गठबन्धनको उम्मेदवारबीच कडा टक्कर हुने विश्लेषण गरिएको छ । जनता समाजजादी र स्वतन्त्रबाट स्थानीय तहको निर्वाचन जितेकाहरूनै निर्वाचन जिताउने आधार भएको ठान्दै दुवै पक्ष सोही मत तान्‍न कस्सिएको पाइएको छ ।

लुम्बिनी प्रदेशमा रहेका १०९ स्थानीय तहमा नेकपा एमालेका ९१, नेपाली कांग्रेस ६४, नेकपा माओवादी(केन्द्र) ३९, जसपा १३, राष्ट्रिय जनमोर्चा ५, राप्रपा २ र स्वतन्त्र ३ जना रहेको दाबी गरिएको छ । लुम्बिनी प्रदेश सभा सदस्यको कुल संख्या ८७ हो । तर, अहिले कायम रहेको संख्या ८३ छ ।

एमाले गठबन्धनमा ४२ जना सांसद छन् । विपक्षी गठबन्धनका ४१ छन् । नेकपा एमालेका ३८, नेपाली कांग्रेसका १९, माओवादी केन्द्र १९ (विमला वलीसहित), जसपा महन्थ पक्ष ४, जसपा उपेन्द्र पक्ष २ र राष्ट्रिय जनमोर्चाका १ सांसद लुम्बिनी प्रदेश सभामा छन् ।


Author

विक्रम खड्का

खड्का इकागजका लुम्बिनी प्रदेश प्रतिनिधि हुन् ।


थप समाचार
x