ओलीले आफ्‍नो कुर्सी बचाउन प्रतिनिधि सभाको हत्या गरे : राजेन्द्र महतो

जनकपुरधाम : जनता समाजवादी पार्टीका वरिष्ठ नेता राजेन्द्र महतोले प्रधानमन्त्री केपी शर्मा ओलीले आफ्‍नो कुर्सी बचाउन संविधानको हत्या गरेको बताएका छन् । महतोले संघीयतालाई धरापमा पार्न संविधानलाई अकालमा मृत्युमा धकेलेको आरोप लगाए ।

जनकपुर उद्योग वाणिज्य संघको ५४ औँ साधारण सभामा शनिबार नेता महतोले यस्तो बताएका हुन् । 'मधेशीको रगतबाट बनेको वर्तमान संविधानबाट स्थापित हुन गइरहेको संघीयतालाई पार्टीको आन्तरिक विवादमा समाप्त पार्ने काम प्रधानमन्त्री केपी शर्मा ओलीले गरेका छन्,'  महतोले भने, 'एक त संविधान पहिलादेखि नै रक्तरंजित थियो, हामी स्वीकार्य नभएपनि संघीयता संस्थागत गर्न अपुरो भएपनि संधशोधनबाट पुर्ण बनाउने आशमा हामीले स्वीकार गरेका थियौं । तर ओलीले त्यसलाई पनि समाप्त पारेर मुलुकलाई दशकैं पछाडि धकेल्ने काम गरे ।'

---

महतोले प्रतिनिधि सभा विघटन गर्ने प्रतिगमनकारी कार्य यसअघि पनि राजा महराजादेखि तत्कालिन एमाले, नेपाली कांग्रेसले सत्ता शासन टिकाउन कयौं पटक गरिसकेको बताए । तर ओलीको यो प्रतिगमन पहिलाको प्रतिगमनभन्दा कयौं गुणा ठूलै प्रतिगमन भएको महतोको आरोप छ । 

रक्तरञ्जित संविधानलााई टेकेर बनेको जनप्रतिनिधिहरूको सर्वोच्च संस्था प्रतिनिधि सभालाई औलीले आफ्नो कुर्सी बचाउन अकालमा मृत घोषणा गरिदिएको बताए । 

महतोले प्रधानमन्त्री ओलीलाई जनताको अधिकार खोस्‍न, प्रतिगमन गर्नबाट फूर्सद नभएको बताए । 

एक अर्को प्रसंगमा नेता महतोले प्रदेश २ को अस्थायी राजधानी जनकपुरधामलाई स्थानी राजधानी बनाएर छाड्ने प्रतिबद्धता जनाए ।