नयाँ नेतृत्वको नीति बुझाउन अमेरिकी राजदूत बेरी भेटघाटमा व्यस्त

काठमाडौँ : अमेरिकी राजदूत र्‍याण्डी बेरीले अमेरिकी नीतिबारे सबै राजनीतिक नेतृत्वलाई बुझाउन भेटघाट अघि बढाएका छन् । डोनाल्ड ट्रम्पका कारण अप्ठ्यारोमा परेको बाह्य विश्‍वसँगको सम्बन्धमा पुनः सक्रिय हातोमालो गर्ने  अमेरिकी नीति अनुरूप उनले भेटघाट थालेका हुन् ।

प्रधानमन्त्री केपी शर्मा ओलीसँग भेटेर अघि बढेका बेरीले नेकपाको अर्को समुहको नेतृत्व गरिरहेका पुष्पकमल दाहाललाई भेटेर अमेरिकी प्राथमिकता सुनाएका हुन् । अमेरिकी प्रशासनले विश्‍वभर आफ्ना प्रतिनिधिलाई सक्रिय पारेलगत्तै भेटघाटमा राजदूत बेरी अघि बढेका हुन् । 

---

अमेरिकाले गठबन्धन मुलुकसँगको सम्बन्ध मर्मत गर्दै थप सक्रिय बनाउने र सशक्त रूपमा आफू विश्‍व राजनीतिमा संलग्‍न हुने भनिरहेको अवस्थामा सोमबार दाहाललाई भेटेर अमेरिकी प्राथमिकता र चासो स्पष्ट पारेका हुन् ।

ट्रम्प प्रशासनका समयमा आफ्‍ना धारणा राख्‍नसमेत समस्यामा परेका अमेरिकी प्रशासकहरू यतिबेला आफ्नो नयाँ नेतृत्वको धारणा व्यक्त  गरेका छन् । अमेरिकीहरू लोकतन्त्रमा विश्‍वास राख्‍ने मुलुकसँग सहकार्य गर्ने धारणासहित आफ्नो ‘ग्यांगिङ’ अनुरुप नै यो भेटवार्ता भएको हो ।

भेटवारे बेरीले ट्‍वीट गर्दै भनेका छन्, ‘नयाँ नेतृत्वपछिको अमेरिकी प्राथमिकताबारे जानकारी दिने क्रम जारी छ ।’ आफ्नो मुलुकको प्राथमिकता उनले सबै नेतृत्वलाई सुनाउनेछन् । नयाँ नेत‍ृत्वले ‘क्यापिटोल हिल’मा शपथ खाएको भोलिपल्ट नै बेरीले कामचलाउ प्रधानमन्त्री केपी शर्मा ओलीसँग भेटी नयाँ राष्ट्रपति जो बाइडनका शीर्ष प्राथमिकताबारे जानकारी गराएका थिए ।

बाइडन प्रशासनले जलवायु परिवर्तनदेखि आणविक प्रसारसम्म र साइबर युद्धदेखि कोभिड-१९ जस्ता विश्‍वव्यापी स्वास्थ्य चुनौतीसम्म कुनै मुलुकले एक्लै सामना गर्न नसक्ने  साझा चुनौती भएको भन्दै यी चुनौती सम्बोधन गर्न नेपालसहितका मुलुकहरूको सहकार्यमा जोड दिएको राजदूतले भेटका क्रममा बताएका थिए । 

बाइडन प्रशासनले स्वदेशमा र विश्‍वभर महिला तथा बालिकाहरूको अधिकारको उत्थानमा केन्द्रित हुनेलगायत मानव अधिकारको नेतृत्व लिने उनले भेटमा बताएका थिए । नयाँ राष्ट्रपतीय प्रशासनको विश्‍वव्यापी प्राथमिकताहरूबारे उच्चस्तरीय बैठकहरू गरिरहने राजदूत बेरीले बताएका थिए ।  

पछिल्लो समयमा अमेरिकी सहयोग मिलेनियम च्यालेन्ज कर्पोरेसन (एमसीसी) मा केही बुझाइ कम हुँदा त्यसमा भएका तिता कुराहरूलाई पनि माझ्‍ने काम नेतृत्वले गरेका छन् । अमेरिकाले नेपाललाई उपलब्ध गराउन लागेको सबैभन्दा ठूलो दुई पक्षीय सहयोगलाई नेपाल सरकारले खासगरी सत्तारुढ दलभित्रको विवादले असहज अवस्थामा पारेको थियो ।

त्यो सहयोगसम्बन्धी विषय अझै यसै रहेको छ । दाहालसहित उनी निकट केही नेताहरूले उक्त सहयोगलाई इन्डो प्यासिफिक रणनीतिको एक पाटोको रूपमा प्रस्तुत गरेका थिए । त्यो सबै पाटोमा अडेर छलफल भए पनि एमसीसीलगायतमा छलफल भए या नभएको विषय बाहिर आएको छैन ।