जापान भ्रमणको क्रममा प्रचण्डले दिएको अभिव्यक्तिले नेपाल र नेपालीको शिर निहुँरियो : खिमलाल भट्टराई

काठमाडौँ - प्रमुख प्रतिपक्ष दल नेकपा (एमाले)का राष्ट्रियसभा संसदीय दलका नेता खिमलाल भट्टराईले सत्तारुढ माओवादी केन्द्रका अध्यक्ष पुष्पकमल दाहालले जापान भ्रमणको क्रममा दिएको अभिव्यक्तिले नेपाल राष्ट्र र नेपाली जनताको शिर नेता को टिप्पणी गरेका छन् । 

नेपालमा एक पटक पनि नआएका तत्कालीन प्रधानमन्त्री सिन्जु आबे नेपालमा आएको बेला दुई, तीन पटक दुई मुलुकको हितको विषयमा कुरा भएको भनेर अध्यक्ष दाहालले जापानमा अभिव्यक्ति दिएको भन्दै नेता भट्टराईले त्यसले सिंगो मुलुकको शीर निहुँर्‍याएको बताएका हुन् । 

---

बुधबार राष्ट्रियसभा बैठकमा विशेष समय लिएर बोल्दै नेता भट्टराईले पूर्वप्रधानमन्त्री र सत्तारुढ दलको जिम्मेवार नेता दाहालले नेपाल भ्रमणमै नआएका आबेबारे अति हल्का टिप्पणी गरेको भन्दै आपत्ति जनाए । उनले भारत भ्रमणको बेला पनि दाहालले भारतीय प्रधानमन्त्री नरेन्द्र मोदीलाई भेटन नसकेकोमा पनि असन्तुष्टि व्यक्त गरे ।

नेता भट्टराईले भने, ‘गठबन्धन भित्रका एक जना सिनियर नेता उहाँले भारतको भ्रमण गर्नु भयो । उहाँले जापानको भ्रमण गर्नु भएको छ । तर कसरी भ्रमण गर्दै हुनुहुन्छ ? उहाँ के बोल्दै हुनुहुन्छ ? र, यसकाले हाम्रो देशको उचाईलाई, हाम्रो देशको राजनीतिलाई, परिवर्तनलाई कस्तो एउटा प्रभाव पारिराखेको छ ? पुष्पकमल दाहाल प्रचण्ड केही समय अगाडि भारत भ्रमण गर्नु भयो । एउटा सिनियर नेताले विदेश भ्रमण गर्दाखेरी देशको उचाई भन्नुपर्ने हो । जनताको उचाई माथि हुनुपर्ने हो । तर भारत भ्रमण गर्नु भयो । कुन, कुन बैठक गर्नु भयो । के गर्नु भयो । एकछिनलाई त्यो छोडिदिऊ । उहाँको तयारीको विषयलाई मात्रै हेर्ने हो भने यहाँ सिनियर नेताहरुले सामाजिक सञ्जालमा लेख्नु भयो भारतीय प्रधानमन्त्रीसँग भेटेर राष्ट्रियताको बारेमा कुरा हुन्छ । कालपानीको बारेमा, लिम्पियाधुराको बारेमा, लिपुलेकको बारेमा कुरा हुन्छ । एकदम देशको स्वार्थको, देशको हितको कुरा हुन्छ भनियो, लेखियो । तर पछि भेटघाटै भएन । त्यत्रो सिनियर नेता पूर्वप्रधानमन्त्री यत्तिकै लुत्रुक्क फर्केको देखियो । यसले हाम्रो देशको यो परिवर्तनलाई देशको राजनीतिलाई कस्तो बनाउँछ ? के हो यो ? अनि जापान भ्रमण जानु भयो । जापान भ्रमणमा जाँदाखेरी उहाँले शानका साथ भन्नु भयो–पूर्व प्रधानमन्त्री जसले अस्ति भर्खरै हत्या गरिएकको छ । सिन्जु आबे नेपाल आएको बेलामा दुई दुई पटक उहाँसँग कुरा भएको छ नेपालका आपसी हितको बारेमा दुई तीन पटक कुरा भएको छ विकास निर्माणको बारेमा । गौरवको साथ उहाँले भन्नु भयो । जबकि सिन्जु आबे नेपाल आउनु भएकै थिएन । यस्तो खालको यो हल्का प्रस्तुतीले, हल्का टिप्पणीले के हुन्छ यो ? एउटा सिनियर नेता, देशको जिम्मा लिएको भनौं यत्रो सत्ता गठबन्धन छ हामी चलाएको छौ भनिएको छ । तर, यस्तो हल्का प्रस्तुति, यस्तो हल्का टिप्पणी, यस्तो हल्का तयारी यो के हो यो ? देश चल्छ ? लोकतन्त्र बलियो हुन्छ, गणतन्त्र चलाउने, संघीयता चलाउने, बलियो बनाउने यस्तै तरिकाले हो ? देशको जिम्मा लिनु भनेको । भने यसप्रति मेरो टिप्पणी छ । आलोचना छ । यस्तो नगरौं । यसले देशलाई हल्का बनाउँछ । जनताको शीर निहुँ¥याउँछ । मेरो आग्रह छ ।’

नेता भट्टराईले मूल्यवृद्धिले आहात भएका जनतालाई सुन्न र देख्न नसकेको भन्दै सरकारको चर्को आलोचना समेत गरे । दैनिक उपभोग्य खाद्यान्नको मूल्यवृद्धि एक वर्षमा सरकारले ११७ प्रतिशत वृद्धि गरेको उल्लेख गर्दै उनले आक्रोश समेत व्यक्त गरे ।