नयाँ भवन निर्माण र भौतिक संरचना थप्नु आवश्यक - गृहमन्त्री लेखक

काठमाडौं - गृहमन्त्री रमेश लेखकले कारागारको नयाँ भवन निर्माण र भौतिक संरचना थप्नु आवश्यक रहेको बताएका छन् । 

सिंहदरबारमा बुधबार बसेको प्रतिनिधिसभा अन्तर्गतको राज्य व्यवस्था तथा सुशासन समितिको बैठकमा गृहमन्त्री लेखकले मुलुक भरका कारागारमा कैदीबन्दीको सङ्ख्या क्षमताभन्दा बढी रहेकाले संरचना निर्माण गर्नुको विकल्प नरहेको बताएका हुन् । 

---

उनले कारागारको भौतिक संरचना थप गर्नुपर्ने, कैदीबन्दीको स्वास्थ्य उपचारदेखि सिदा रकम वृद्धिलगायत समग्र विषय व्यवस्थापनका लागि आर्थिक व्यवस्थापन जरुरी रहेको पनि बताए । सीमित स्रोत साधन र सीमित आर्थिक व्यवस्थामा बढी काम गर्नुपरिरहेको भन्दै उनले कारागार र बाल सुधार गृहको भौतिक अवस्था अपर्याप्त, जीर्ण र दयनीय रहको जानकारी दिए । 

लेखकले बाल सुधार गृहमा बसेका बालबालिकाको आधारभूत मौलिक हक, अधिकार  र मानव अधिकार संरक्षण एवं सुरक्षामा प्रतिबद्धता व्यक्त गरे । 

त्यसैगरी देशमा शान्ति सुरक्षा, अमन चयन स्थापित गर्न तथा सुशासनको प्रत्याभूति एवं सुनिश्चितताका लागि केही कानुन संशोधन परिमार्जन र नयाँ निर्माणमा आफू लागि परेको बताए । उनले प्रहरी सङ्गठन सुदृढ गर्न प्रहरी ऐन संशोधन गर्नुपर्ने भन्दै कर्मचारीको सरुवालाई सरुवाकै रुपमा बुझिदिन आग्रह गरे । 

बैठकमा रास्वपा सभापति रवि लामिछानेले मन्त्रालयमा बसेर काम गर्दा आफू अनुकूलको मिडिया ट्रायल हुने गरेको अनुभव सुनाए । नियम र प्रक्रियाका आधारका काम गर्दा पनि आफूले विभिन्न आरोप खेप्न परेको भन्दै उनले सजक हुन गृहमन्त्री लेखकलाई सुझाव दिए । 

बैठकमा गृहमन्त्रालयका अधिकारीहरूले मनसुन जन्य विपद्को प्रति कार्यलाई प्रभावकारी बनाइएको र प्राकृतिक विपद् न्यूनीकरणका लागि पूर्व सूचना प्रणालीको विकास, घटनापछि उद्धार र राहतका लागि गम्भीर भएर लागेको जनाएका थिए ।