काठमाडौं–१ नै किन रोज्छन् नयाँ उम्मेदवारले ?

काठमाडौं : स्थानीय निर्वाचन सकिएलगत्तै सबैको चासो अब संघ र प्रदेशको चुनावतिर मोडिएको छ । प्रतिनिधिसभाको निर्वाचनका लागि स्वतन्त्र र नयाँ दलका उम्मेदवारले धमाधम आफ्नो उम्मेदवारी घोषणा गर्न थालेका छन् । स्थानीय निर्वाचनमा जस्तै प्रतिनिधिसभाको निर्वाचनमा नयाँ दल र स्वतन्त्र उम्मेदवारको चर्चा सुरु भइसकेको छ । 

काठमाडौंको क्षेत्र नम्बर १ बाट सामाजिक अभियन्ता पुकार बमले स्वतन्त्रबाट उम्मेदवारी घोषणा गरिसकेका छन् । ‘अहिलेसम्म सडकबाट नागरिकका निम्ति सकेको काम गरेँ,’ उनले आफ्नो उम्मेदवारी घोषणा गर्दै भनेका छन्, ‘अब संसद् पुगेर नागरिकको आवाज बोल्छु ।’

---

त्यही क्षेत्रबाट पूर्वडीआईजी रमेश खरेलले पनि आफ्नो उम्मेदवारी घोषणा गरेका छन् । उनी स्वतन्त्र उम्मेदवार भने होइनन् । खरेलले आफैँ अध्यक्ष रहेको नेपाल सुशासन पार्टीबाट उम्मेदवारी घोषणा गरेका हुन् । 

प्रतिनिधिसभा निर्वाचनमा काठमाडौं १ सधैँ चर्चामा रहन्छ । चर्चामा रहेको यही क्षेत्रबाटै नयाँ उम्मेदवारले प्रायः उम्मेदवारी दिन्छन् । २०७४ को प्रतिनिधिसभाको निर्वाचनमा विवेकशील साझा पार्टीको तर्फबाट रवीन्द्र मिश्रले यही क्षेत्रबाट चुनाव लडेका थिए । उनको उम्मेदवारीले त्यसबेला काठमाडौं १ को मात्रै नभई देशभरकै माहोल तातेको थियो । मिश्रले त्यसबेला नेपाली कांग्रेसका प्रकाशमान सिंहसँग ८ सय १८ मतले हारेका थिए ।

 

कांग्रेसका सिंहले १० हजार ९ सय ३६ मत ल्याएका थिए भने मिश्रले १० हजार १ सय १८ मत मात्रै पाएका थिए । मिश्रले नजिते पनि उनले ल्याएको मतले काठमाडौँमा त्यसबेला एक किसिमको तरंग ल्याएको थियो । स्थापित दलका उम्मेदवारविरुद्ध लडेर मिश्रले ल्याएको मतले नयाँ उम्मेदवारलाई पनि हौसला मिलेको थियो ।

मिश्र आफैँले हारे पनि जनताले दिएको मतले उत्साही बनाएको प्रतिक्रिया त्यसबेला दिएका थिए । नयाँ उम्मेदवार गएर त्यस ठाउँमा त्यत्रो मत ल्याउला भन्ने धेरैको कल्पना बाहिरको कुरा थियो । तर, मानिसको कल्पना बाहिर गएर मिश्र स्थापित दलका उम्मेदवारमाथि भारी बनेका थिए । सिंहले भने हालसम्म तीन पटक काठमाडौं १ बाट जितिसकेका छन् ।

आसन्न प्रतिनिधिसभाको निर्वाचनमा पनि काठमाडौं १ चर्चामै रहने देखिन्छ । क्षेत्र नम्बर १ मा काठमाडौं महानगरपालिकाको वडा १०, ११, १९ र ३१ पर्छ । यो क्षेत्रमा धेरै जसो बाहिरबाट आएर बसोबास गरेका मतदाता रहेकाले यहाँका स्थापित दलले नै मत पाउँछन् भनेर यकिन गर्न कठिन छ । त्यसैले पनि यो क्षेत्र नयाँ उम्मेदवारको रोजाइमा पर्छ । 

यसपटको स्थानीय निर्वाचनमा काठमाडौंको मेयरमा विजयी भएका स्वतन्त्र उम्मेदवार बालेन शाहले ल्याएको मत हेर्दा पनि प्रतिनिधिसभा उम्मेदवारको रोजाइमा किन यही क्षेत्र पर्‍यो भनेर सहजै अनुमान लगाउन सकिन्छ । स्वतन्त्र उम्मेदवार बालेनले यी क्षेत्रबाट अन्य उम्मेदवारको भन्दा बढी मत ल्याएका थिए । तर, उनले ल्याएको मत प्रतिनिधिसभाका स्वतन्त्र उम्मेदवारले नै पाउँछन् भन्ने ठोकुवा त गर्न सकिँदैन । तर, यस क्षेत्रका मतदाताको मनस्थिति हेर्दा उनीहरूको रुचि स्थापित दलमा मात्रै छैन भन्ने सहजै बुझ्न सकिन्छ । 

काठमाडौं १ मा यसपटक स्वतन्त्रबाट उम्मेदवार बनेका पुकारले स्थापित दलका नेतासँग प्रतिस्पर्धा गर्नेछन् । उनीसँगै मैदानमा पूर्व डीआइजी खरेल पनि छन् । तर, डीआइजी खरेलको तुलनामा पुकार बलिया उम्मेदवार देखिन्छन् । 

पुकारले काठमाडौंमै बसेर थुप्रै अभियानमा काम गरिसकेका छन् । उनले डा. गोविन्द केसीको अभियानमा सुरुवातबाटै काम गरेका थिए । उनले कोरोनाबाट नागरिकको ज्यान जोगाउन सरकारले पहल लेऊ भनेर २०७७ सालमा आमरण अनशन बसेका थिए । काठमाडौंमै रहेर थुप्रै अभियान मार्फत यहाँको राजनीतिमा सक्रय भूमिका निर्वाह गरेका कारण पुकार परिचित छन् । 

डीआइजी खरेलले प्रहरी सेवामा हुँदा नाम र चर्चा बटुलेका थिए । उनले पनि यहाँको मतादाताको मनस्थिति हेरेर आफ्नो उम्मेदवारी घोषणा गरेका होलान् ।

स्थानीय निर्वाचनबाटै युवा उम्मेदवारको बढ्दो आकर्षणका कारण पुकारलाई पनि मतदाताले नजिकबाट नियालिरहेका छन् । उनले संसद्मा नयाँ प्रतिरोधको आवज संसद्मा पुग्न जरुरी भएकाले आफूले उम्मेदवारी दिएको बताएका छन् ।

 ‘अब मुलुकको नीति बनाउने थलो संसद्ले समेत नयाँ अनुहार खोजेको छ, ताजगी खोजेको छ,’ उनले उम्मेदवारी घोषण गर्दै भनेका छन्, ‘त्यसैले, राजनीतिक भ्रष्टाचार र लुटतन्त्रविरुद्ध युवा प्रतिरोधको आवाज संसद्मा पुग्न जरुरी छ । यसैको पहलस्वरुप मेरो उम्मेदवारी हो ।’

पुकारले अघिल्लो निर्वाचनमा विवेकशील साझाको तर्फबाट रवीन्द्र मिश्रले ल्याएको मत पनि तान्न सक्ने सम्भावना रहेको छ । उनले विवेकशील साझाको सहानुभूति मत पाए पनि विवेकशीलको चाम यस पटक पहिलेको जस्तो नभएकाले धेरै आशावादी हुने ठाउँ भने देखिदैन । 

यस पटकका नयाँ उम्मेदवारलाई काठमाडौं–१ बाट जित हासिल गर्न कांग्रेसबाट ‘ह्याट्रिक’ जित निकालेका सिंह भारी पर्न सक्छन् । एमाले उठाउने उम्मेदवारलाई पनि नजरअन्दाज भने गर्न सकिँदैन । अघिल्लो निर्वाचनमा एमाले र माओवादीको गठबन्धन भएका कारण एमालेले आफ्नो उम्मेदवार उठाएको थिएन । माओवादीका उम्मेदवार अनिलकुमार शर्माले ५ हजार ३ सय ३६ मत ल्याएका थिए ।