नेकपाका केन्द्रीय सदस्य, उदयपुर जिल्ला अध्यक्ष रामकुमार चौधरी आजपामा प्रवेश

काठमाडौँ- ऋषि कट्टेल नेतृत्वको नेपाल कम्युनिष्ट पार्टी (नेकपा) का केन्द्रीय सदस्य एवं उदयपुर जिल्ला अध्यक्ष रामकुमार चौधरीले पार्टी परित्याग गरी प्रभु साह नेतृत्वको आम जनता पार्टी (आजपा) मा प्रवेश गरेका छन् । 

आज आजपा केन्द्रीय कार्यालय काठमाडौँमा एक कार्यक्रमका बीचमा केन्द्रीय सदस्य चौधरीले आजपामा प्रवेश गरेका हुन् । चौधरीलाई आजपा अध्यक्ष एवं पूर्वमन्त्री प्रभु साहले टीका र खादा लगाएर पार्टीमा प्रवेश गराएको आइटी आर्मीका केन्द्रीय सदस्य रामशरण यादवले जनाएका छन् । 

---

आजपा प्रवेश गरेका चौधरीले प्रभु साह नेतृत्वको पार्टीको नीति, विचार तथा कार्यक्रम मुलुकको परिवर्तनका लागि आवश्यक भएकाले यो पार्टी प्रवेश गरेको बताए । 

आजपाले भ्रष्टाचार, अनियमितता, कुशासनको विरुद्धमा जारी गरेको संघर्षका कार्यक्रमले आफू प्रभावित भएको बताउँदै उनले समृद्ध नेपाल निर्माणका लागि पार्टीको जारी अभियानमा लाग्ने बताए । पछिल्लो समय विभिन्न पार्टी परित्याग गरी आजपामा प्रवेश गर्ने लहर चलेको केन्द्रीय सदस्य यादवले जनाएका छन् ।