आगामी निर्वाचनसम्म कांग्रेस प्रतिपक्षीमा बस्छ : महामन्त्री थापा

काठमाडौँ- नेपाली कांग्रेसका महामन्त्री गगन थापाले आगामी निर्वाचनसम्म कांग्रेस प्रतिपक्षीमा बस्ने स्पष्ट पारेका छन् ।

शनिबार काठमाडौँमा आयोजित वर्तमान राजनीतिक अवस्थामा कांग्रेसको भूमिका विषयक कार्यक्रममा थापाले कांग्रेस सरकार परिवर्तनको खेलमा नलाग्ने भन्दै ८४ सम्म प्रतिपक्षीको भूमिकामा रहने बताएका हुन् । प्रतिपक्षीमा रहे पनि कांग्रेसले एमालेलगायतका दलहरूसँग सम्वादलाई निरन्तरता दिने र मुलुकको हितका बारेमा नेतृत्वदायी भूमिका निर्वाह गर्ने उनले जिकिर गरे ।

---

थापाले अहिलेको अवस्थामा मुलुकको निर्वाचन प्रणाली परिवर्तनका लागि संविधान संशोधन गर्नुपर्ने भन्दै यसका लागि एमाले माओवादीसँग छलफल गर्ने जिकिर गरे । संविधानलाई स्थायित्व दिनका लागि पनि मुलुकको प्रदेश र निर्वाचन प्रणालीसम्बन्धी व्यवस्थालाई संशोधन गर्नुपर्ने उनको भनाइ छ ।

उनले गिरीबन्धु प्रकरणमा कांग्रेसमाथि एमालेले लगाएको आरोप गलत भएकाले यसको प्रतिवाद गर्नुपर्ने धारणा राखे । गिरीबन्धुमा अदालतको गलत अपव्याख्या एमालेले गरेको भन्दै उनले यसको जवाफ सदनका आगामी बैठकबाट दिने स्पष्ट पारे ।

महामन्त्री थापाले अदालत र संवैधानिक निकायहरूलाई प्रभावित गर्ने र कांग्रेस नेताहरूलाई तर्साउने काम भइरहेको आरोप लगाए । उनले कांग्रेस नेताहरूलाई अप्ठ्यारोमा पार्न खोज्दा सिंगो पार्टी एक भएर बोल्न सक्नुपर्ने बताए ।