अनेरास्ववियुले मुख्यमन्त्री र मन्त्रीका गाडी चल्न नदिने

बुटवल- प्रहरीले आन्दोलनमा दमन गरेको भन्दै अनेरास्ववियुले थप आन्दोलनका कार्यक्रम घोषणा गरेको छ । 

एमाले निकट विद्यार्थी संगठन अनेरास्ववियुले पेट्रोलियम पदार्थको मूल्यवृद्धि फिर्ता लिनु पर्ने तथा स्थानीय तहको निर्वाचन तत्काल घोषणाको माग गर्दै सोमबार लुम्बिनी प्रदेशको मुख्यमन्त्री कार्यालयअघि गरेको प्रदर्शनमा प्रहरीले हस्तक्षेप गरेको थियो । प्रहरीले हस्तक्षेप गरेको भन्दै अनेरास्ववियुले थप कार्यक्रम घोषणा गरेको हो ।

---

अनेरास्ववियुले मंगलबार रूपन्देहीमा लुम्बिनी प्रदेशका मुख्यमन्त्री, मन्त्री तथा राज्यमन्त्रीका गाडी चल्न रोक लगाउने र २ बजे बुटवल बहुमुखी क्याम्पसबाट विरोध प्रदर्शन गर्ने कार्यक्रम तय गरिएको अध्यक्ष शेषकान्त पोखरेलले बताए ।

सोमबार आन्दोलनका क्रममा अनेरास्ववियुका केन्द्रीय सचिवालय सदस्य तथा रुपन्दही इन्चार्ज बालकृष्ण पाण्डे, केन्द्रीय सदस्य कृष्ण पौडेल, जिल्ला कमिटी अध्यक्ष शेषकान्त पोखरेल, जिल्ला सदस्य तथा बुटवल उपमहानगर कमिटीका अध्यक्ष रोशन घिमिर, जिल्ला कमिटी सदस्य गुनबहादुर श्रेष्ठ, बुटवल बहुमुखी क्याम्पस कमिटी अध्यक्ष गोविन्द रिजाल, सिद्धार्थ गौतम बुद्ध क्याम्पस कमिटी अध्यक्ष समिर अधिकारीलगायत घाइते भएको अनेरास्ववियुले जनाएको छ ।

नगर कमिटी अध्यक्ष रोशन घिमिरेको टाउकोमा गम्भीर चोट लागेको र उनको लुम्बिनी प्रादेशिक अस्पताल बुटवलमा उपचार भइरहेको छ ।