निर्वाचन आयोगको निर्णयविरुद्ध सर्वोच्च अदालत जाने तयारीमा पूर्वमाओवादी

काठमाडौँ : निर्वाचन आयोगको निर्णयविरुद्ध पूर्वमाओवादी केन्द्रका नेताहरू सर्वोच्च अदालतमा जाने निर्णय गरेका छन् । कानुन व्यवसायीमार्फत नै पहिलो चरणमा निर्वाचन आयोग गएको र त्यहाँबाट आफू अनुकूल निर्णय नआएपछि  उनीहरू सर्वोच्च अदालत जाने भएका हुन् । 

आइतबार बसेको आयोगको बैठकले पुष्पकमल दाहाल नेतृत्वको माओवादी केन्द्र वैधानिक रहेकाले दल दर्ता खारेज गर्नुनपर्ने निर्णय गरे लगत्तै पूर्व माओवादीहरूले आफ्ना कानुन व्यवसायीसँगको परामर्शसँगै सर्वोच्च अदालत जाने भएका हुन् । 

---

माओवादी छाडेर एमालेमा प्रवेश गरेका नेताहरूले आयोगको उक्त निर्णयविरुद्ध सर्वोच्च जाने जानकारी नेता टोपबहादुर रायमाझीले दिए । आयोगको निर्णयलाई हामीले कानुनसम्मत निर्णय भन्न नसकिने पनि उनले बताए । ‘आयोगको यस्ता पूर्वाग्रही निर्णयलाई हामीले अदालतबाट सच्याउने छौँ,’ उनले भने, ‘हामी सल्लाह गरेर तत्काल नै अदालतमा जानेछौँ ।’ 

माओवादी केन्द्र परित्याग गरी एमालेमा गएका टोपबहादुर रायमाझी, प्रभु साह, लेखराज भट्ट र गौरीशंकर चौधरीलगायतका नेताहरूले दल दर्ता खारेजीको माग गर्दे निवेदन वकिलमार्फत दिएका थिए ।

माओवादीको २०६९ मा अधिवेशन भएर २०७५ एकीकरणको थियो । त्यतिबेला ५ वर्ष पुगेको थिएन । अदालतले गत फाुगन २३ मा छुट्याएको थियो । त्यो बीचको अवधिमा अडिट रिपोर्ट पनि बुझाउने र अन्य प्रक्रिया पूरा गर्दै गएको कारणले गर्दा दल अवैध भएको घेषणा गर्न नमिल्ने निर्णय आयोगले लिएको थियो  ।