कोभिडबाट जनताको जीवन रक्षा गर्नु सरकारको पहिलो प्राथमिकता : प्रधानमन्त्री

काठमाडौँ- प्रधानमन्त्री शेरबहादुर देउवाले कोभिड-१९ संक्रमणबाट जनताको जिवन रक्षा गर्नु सरकारको पहिलो प्राथमिकता भएको बताएका छन् । बुधबार काठमाडौँमा नेपाल उद्योग परिसंघको १८ औं वार्षिक साधारण सभा उद्घाटन गर्दै प्रधानमन्त्री देउवाले कोभिड महामारीबाट जनताको जिवन रक्षा गर्न सरकार लागि परेको र यसका लागि नीजि क्षेत्रको साथ आवश्यक रहेको बताएका हुन् । 

उनले मुलुकमा विकास लगायत धेरै कुराको आवश्यक रहे पनि अहिले भने सरकारको ध्यान कोभिड नियन्त्रणमा ल्याउनेमा रहेको उल्लेख गरे । प्रधानमन्त्री देउवाले नेपालमा कोभिडको तेश्रो भेरियन्ट भित्रन नदिन हरसम्भव तयारी गरिरहेको बताए । उनले सबै नागरिकलाई खोपको पहुँचमा पुराउने प्रतिबद्धता दोहर्‍याए । कोभिड नियन्त्रण र रोकथामका लागि सरकारलाई साथ दिन उनले निजि क्षेत्रलाई आह्वान पनि गरे । 

---

उनले अहिलेको अर्थमन्त्री मेहनती र भिजन भएको भन्दै नेपालको अर्थतन्त्रलाई पहिलेको भन्दा सुधार गर्ने विश्वास व्यक्त गरे । 

कार्यक्रममा अर्थमन्त्री जनार्दन शर्माले हरेक कुरामा मुलुक आत्मनिर्भर नभएसम्म जनताको समस्या समाधान गर्न नसक्ने बताए । उनले उपभोक्तावादी अर्थतन्त्रलाई उत्पादनमुलक अर्थतन्त्रमा बदल्ने चुनौती रहेको बताए । उत्पादन वृद्धि नगरी आत्मनिर्भर अर्थतन्त्रको निर्माण गर्न नसक्ने उनको भनाइ छ । उनले कोभिडका कारण निजी क्षेत्रमा परेको असरलाई माथि उठाउन राहत कार्यक्रम ल्याउने बताए ।