जापान सरकार अनुदानित बाँकी खोप भदौ ५ देखि ७ भित्र आइसक्ने

काठमाडौँ– जापान सरकारले नेपाललाई अनुदानमा उपलब्ध गराउन लागेको कोभिड–१९ विरुद्धको अष्ट्राजेनेका खोपको सबै हिस्सा भदौको ५ देखि ७ गतेभित्र नेपाल आउने भएको छ । 

काठमाडौँस्थित जापानी दूतावासले विज्ञप्ति जारी गरी आगामी शनिबारदेखि सोमबारसम्म जापान सरकारले कोभ्याक्समार्फत् नेपाललाई अनुदानमा उपलब्ध गराएको १६ लाख १४ हजार ७ सय ४० मात्रा खोप आइसक्ने बताएको छ । यसअघि साउनको २३ र २४ गते अघिल्लो खेपमा ५० प्रतिशत खोप ल्याइएको थियो । 

---

उक्त खोप   कोभिशिल्ड खोपको पहिलो मात्रा लिएर दोस्रो खोपको प्रतिक्षामा रहेका साथै ६५ वर्ष र सोभन्दा माथिको उमेर समूह तथा वैदेशिक रोजगारी, अध्ययन र अन्य कारणले विदेश जाने, मिर्गौला डायलाईसिस गर्नुपर्ने तथा अङ्ग प्रत्यारोपण गरेका र क्यान्सरका बिरामी गरि १४लाख व्यक्तिका लागि वितरण भैरहेको छ । 
जापानले कोभिड–१९ महामारी नियन्त्रणका लागि कोलिशन फर इपिडेमिक प्रिपियर्डनेस इनोभेसन्स (सेपि), गाभी– विश्वव्यापी खोप सहकार्य, संयुक्त राष्ट्रसंघीय बालकोष र विश्वस्वास्थ्य संगठनसँग काम गर्दै आएको छ । 

नेपालका लागि जापानी रावदूत किकुता युताकाले खोप अनुदान नेपाल र जापानबीचको मैत्रीपूर्ण सम्बन्धको प्रतीक भएको बताएका छन् ।