सिके राउतका कार्यकताले खानेपानीका प्रमुखलाई अर्धनग्न बनाएर बजार घुमाए

जनकपुरधाम – डा. सिके राउत नेतृत्वको जनमत पार्टीका नेता कार्यकर्ताले गुण्डागर्दी शैलीमा नेपाल खानेपानी तथा ढल निकास कार्यालय जनकपुर शाखाका निमित्त प्रमुख राजेश्वर कुशवाहालाई कुटपिट गर्दै अर्धनग्न अवस्थामा नगर परिक्रमा गराएका छन् ।

खानेपानीको आयोजनाको काम अधुरै छोडेको कारण सडक तथा बाटोहरूमा आवात-जावत गर्न समस्या भएको भन्दै जनमत पार्टीका नेता कार्यकर्ताले आज बिहीबार उनलाई अर्धनग्न बनाएर बजार घुमाएका हुन् ।  रामानन्द चोकस्थित खानेपानीको कार्यालयमा प्रवेश गरी उनीमाथि कुटपिट गर्दै लुगासमेत फुकालेर अर्धनग्न बनाइ जुलुस निकालेर निमित्त प्रमुख कुशवाहालाई नगरको विभिन्न भागको परिक्रमा गराए । 

---

जनकपुरधाम उपमहानगरपालिका-८ बलवा टोलमा खानेपानी विस्तारका लागि पाइप लाइन खनेर अलपत्र छोड्दा बाटो बिगारेले कारबाही गरिएको जनमत पार्टीका नेता कार्यकर्ताले बताएका छन् ।  जनमत पार्टीका अध्यक्ष सिके राउतको घरसम्म जाने बाटोमा बिगारेको भन्दै खानेपानीका प्रमुखलाई खबरदारी स्वरुप अर्धनग्न गरी नगर परिक्रमा गराइएको जनाइएको छ ।

जनमत पार्टीका सचिव इन्द्रजीत यादवले भने जनकपुरधाम उपमहानगरपालिका र खानेपानी संस्थानको कारण बाटो हिलाम्य भई आवागमन समस्या भएको कारण खबरदारी स्वरुप कारबाही गरिएको बताएका छन् ।  

सुरक्षार्थ खटिएका प्रहरीको उपस्थितिमै जनमत पार्टीका कार्यकताले प्रमुख कुशवाहालाई नगर परिक्रमा गराएको हो । जुलुुससँगै प्रहरी भए पनि प्रमुख कुशवाहालाई कारबाही गर्दा किन केही गर्नु भएन भन्ने प्रश्नमा जिल्ला प्रहरी कार्यालय धनुषाका प्रवक्ता जितेन्द्र बस्नेतले केही बोल्न चाहेनन् । 

जुलुससहित प्रमुख कुशवाहालाई अर्धनग्न नगर परिक्रमा गराउंदै राउतका कार्यकर्ताहहरू जनकपुरधाम उपमहानगरपालिकाको कार्यालयलाई बुझाएर त्यहाँबाट मुख्यमन्त्री लालबाबु राउत साइकल चोर प्रदेश छोड, मेयर लालकिशोर साह मुर्दावादलगायतका नारा लगाउँदै फर्केका थिए ।

बाटो ग्राभेलको माग गर्दै दुई साताअघि जनमत पार्टीका नेता कार्यकर्ताले जनकपुरधाम उपमहानगरपालिकामा तोडफोड गरेका थिए । मेयर लालकिशोर साहलाई कालोमोसो दल्न पुगेका कार्यकर्ता मेयर नभेटाएपछि उपमहानगरपालिकाको कार्यालयमा तोडफोड गरी फर्केका थिए । प्रहरीले प्रदर्शनमा उत्रिएका १० जनालाई भने नियन्त्रणमा लिएको बताइएको छ ।