म पनि राप्रपाजस्तै राष्ट्रवादी : दाहाल

काठमाडौँ - नेकपा माओवादी केन्द्रका अध्यक्ष पुष्पकमल दाहालले आफू पनि राष्ट्रिय प्रजातन्त्र पार्टी (राप्रपा)जस्तै राष्ट्रवादी भएको बताएका छन् । बुधबारबाट काठमाडौंमा सुरू भएको राप्रपाको एकता महाधिवेशनमा बोल्दै अध्यक्ष दाहालले यस्तो बताएका हुन् । 

‘राप्रपा र हाम्रो मत त मिल्दैन । म गणतन्त्रवादी, धर्म निरपेक्षतावादी । तर म पनि तपाईंहरूजस्तै राष्ट्रवादी हुँ । म राष्ट्रिय प्रजातन्त्र पार्टीका नेता, कार्यकर्ताहरूलाई यस अर्थमा पनि धन्यवाद दिन चाहन्छु,’ दाहालले भने । आफ्नो राष्ट्रवाद र राप्रपाको राष्ट्रवाद उस्तै भएको उनले टिप्पणी गरे । राप्रपा र आफ्नो पार्टीको मत भने नमिल्ने उनले स्पष्ट पारे ।

---