पर्यटन बोर्डका सिइओ धनञ्‍जय रेग्मी निलम्बनमा, नन्दिनी भइन् निमित्त सिइओ

काठमाडौँ -  पर्यटन बोर्डका प्रमुख कार्यकारी अधिकृत (सिइओ) धनञ्जय रेग्मी निलम्बनमा परेका छन् । आज शुक्रबार बसेको पर्यटन बोर्डको बैठकले निलम्बन गरेर रेग्मीमाथि लागेको आरोप छानबिन प्रक्रिया अघि बढाउने निर्णय गरेको हो । रेग्मी निलम्बनमा परेसँगै वरिष्ठ निर्देशक नन्दिनी थापा लाहेलाई कायमुकायम सिइओको जिम्मेवारी तोकिएको छ ।  बोर्डका उपाध्यक्ष चन्द्र रिजालको नेतृत्वमा तीन सदस्यीय छानबिन समिति पनि गठन गरिएको छ । 

रेग्मीमाथि त्रिभुवन विमानस्थलस्थित भन्सारका कर्मचारीमाथि हातपात गरेको आरोप छ । उनलाई सोही आरोपकै आधारमा संस्कृति पर्यटन तथा नागरिक उड्डयन मन्त्रालयले स्पष्टीकरणसमेत सोधेको थियो । त्यसयता रेग्मी र पर्यटनमन्त्री प्रेम आलेबीच विवाद बढेको थियो । 

---

‘आज बसेको बोर्डको बैठकले सिइओलाई निलम्बन गर्ने निर्णय भएको छ,’ बोर्ड स्रोतले भन्यो, ‘उहाँमाथि लागेको आरोपमाथि छानबिन गर्न पनि समिति बनेको छ ।’  कात्तिक २७ गते बेलायतबाट फर्कनेक्रममा रेग्मीले भन्सारका कर्मचारीमाथि हातपात गरेको आरोप छ ।  आजको बैठक पर्यटन मन्त्रालयका सचिवसमेत रहेका पर्यटन बोर्डका अध्यक्ष महेश्वर न्यौपानेले आह्वान गरेपछि बसेको थियो ।