ओली समूहको सुर्खेत र पोखरामा हुने जनसभा स्थगित

काठमाडौँ : प्रधानमन्त्री तथा अध्यक्ष केपी शर्मा ओली पक्षीय नेकपाले सुर्खेत र पोखरामा गर्ने जनसभा स्थगित भएका छन् । प्रतिनिधि सभा विघटन र चुनावको पक्षमा माहोल बनाउन देशका विभिन्न शहरमा जनसभा गर्दै आएको ओली समूहले फागुन १४ गते सुर्खेतमा र १५ गते पोखरामा वृहत् जनसभा गर्ने कार्यक्रम थियो ।

तर मंगलबार सर्वोच्चले प्रतिनिधि सभा पुनःस्थापनाको पक्षमा फैसला गरेपछि ओली समूहका आगामी कार्यक्रम स्थगित भएका हुन् । सर्वोच्चको फैसलाले प्रधानमन्त्री ओलीको सिफारिसमा राष्ट्रपतिले गएको पुस ५ गते गरेको प्रतिनिधि सभा विघटनको निर्णय बदर गरेको थियो । 

---

प्रतिनिधि सभा पुनःस्थापना भएसँगै ओली नैतिक रुपमा संकटमा छन् । यस्तो अवस्थामा तामझामका साथ विभिन्न जिल्ला र सहरमा गर्न लागिएका सभाहरु स्थगित गर्न थालिएको हो । पोखरामा फागुन १५ गते हुने जनसभाका लागि सबै तयारी स्थगित गरिएको ओली समूहका नेकपा गण्डकीका सचिव गोविन्द नेपालीले बताए ।

उनका अनुसार पोखरामा हुने १५ गतेको जनसभामा १ लाख २० हजार कार्यकर्ता उतार्ने तयारी थियो । यस्तै सुर्खेतमा हुने फागुन १४ गतेको जनसभा पनि स्थगित भएको छ । वीरेन्द्रनगरमा र्‍यालीसहित गर्ने भनिएको जनसभा तत्कालका लागि स्थगित गरिएको कर्णाली प्रदेशका ओली समूहका नेताहरुले बताएका छन् । 

बुधबार बालुवाटारमा बसेको स्थायी कमिटी बैठकले गर्ने निर्णयअनुसार आगामी कार्यक्रम तय गरिने ओली समूहका नेताहरुको भनाई छ ।