कोशी

सांसद राईद्वारा प्रशासकीय अधिकृत पौडेलको ज्यान लिने धम्की

इकागज |
असोज १४, २०७९ शुक्रवार १५:९ बजे

काठमाडौँ– धनकुटा पाख्रीबास नगरपालिकाका प्रमुख प्रशासकीय अधिकृत प्रकाशराज पौडेललाई नेकपा एमालेका केन्द्रीय सदस्य तथा सांसद राजेन्द्र राईले जिल्ला छाड्न धम्की दिएका छन् । उनी धनकुटाका निर्वाचित सांसद पनि थिए ।

बिहीबार पौने ५ बजेतिर अधिकृत पौडेल र राईको संवाद भएको थियो । राईले फोन संवादमा तनहुँबाट आएर मेरो ठाउँमा शासन गर्ने भन्दै उनले धम्की दिएका छन् ।


‘तपाई तुरुन्त जानुहोस् छोराछोरी रोलान्,’ प्रशासकीय अधिकृतलाई धम्काउँदै उनले भनेका छन्, ‘तपाईलाई ठीक लगाइदिन्छु । तपाई ख्याल गर्नुहोला तपाईले धेरै हेप्नु भएको छ ।’

राईले अधिकृत पौडेललाई तुरुन्त छोडेर जान चेतावनी दिएका छन् । ‘तपाईको अस्तित्व म समाप्त पार्दिन्छु । कम अत्याचार गर्नु भएको छ यहाँ । म हेर्दैछु । तत्काल जानुहोस्,’ उनले थप संवादमा भनेका छन्, ‘तपाइलाई कसैले जोगाउन सक्दैन । शेरबहादुर र तपाईको रामचन्द्र पौडेल आए पनि कसैले बचाउन सक्दैनन् । तपाइ खुरुक्क जानुहोस् । मेरो ठाउँमा आएर दादागिरी चलाउने । तपाई जस्तो कति मानिसलाई झुन्ड्याएर राखेको छु ।’

प्रमुख प्रशासकीय अधिकृत पौडेल ६ महिनाअघि नगरपालिकामा प्रशासकीय अधिकृतको रुपमा पुगेका थिए । ‘केही नगरे पनि माननीय राईले धम्क्याउने र थर्काउने काम गर्नुभएको छ’ पौडेलले इकागजसँग भने ।

‘एकोहोरो गाली गर्नुभयो । धम्क्याउनु भयो । भन्ने नभन्ने कुराहरू भन्नुभयो । मलाई बोल्नु दिनु भएन । किन गरेको केही थाहा भएन’, उनले भने, ‘जिल्ला प्रशासन र जिल्ला प्रहरी कार्यालयमा जिउ–ज्यानको सुरक्षा गरी पाउँ भनी निवेदन दिइसकेको छु । सबै ठाउँलाई बोधार्थ बनाएर निवेदन पेश गरेको छु ।’

जिल्ला प्रशासन र मन्त्रालयमा थप के गर्ने भनेर अगाडि बढ्ने पौडेलको भनाइ छ । धम्की खाएर काम गर्न नसक्ने उनले प्रस्ट पारे । ‘मेरो सुरक्षा सरकारले गर्नुपर्छ,’ उनले सुनाए,’ मलाई बेग्लै जिल्लामा सरुवा गर्नुपर्यो ।’

कर्मचारीलाई धम्की किन दिनुभएको भन्ने प्रश्नमा राईले नगरपालिकाभित्रका जनप्रतिनिधिलाई मिलेर काम गर्न नदिएको आरोप लगाएका छन् । अधिकृत पौडेलले नगरपालिकाभित्रका विभिन्न विकासका नाम परेको बजेटहरू पूरा नदिएकाले धम्क्याउनु परेको उनको भनाइ छ । नगरपालिकामा भ्रष्टचार प्रोत्साहन गरिरहेको दाबी समेत राईको छ । ‘कर्मचारीले गाउँस्तरका जनताको दुःख बुझ्दैनन् ।’
सांसद जस्तो व्यक्तिले कर्मचारीलाई धम्क्याउन मिल्छ त भन्ने प्रश्नमा राईले इकागजसँग भने, ‘मैले २० पटक सम्झाए । मेयर साहेब अगाडि पनि जनताले भोट हालेको मानिसलाई असहयोग नगर्नुहोस् भनेर सम्झाएकोछु ।’

राम्रो काम नगरेर बारम्बार शासक बनेकाले अहिलेको अवस्था आएको भनाइ उनको छ । गठबन्धनको सरकार भएकाले उनलाई सरुवा गर्न नसकेको उनको भनाइ छ । स्वाभिमान भएकाले कसैलाई पनि भ्रष्टचार गर्न नदिने उनले बताए ।


Author

थप समाचार
x