प्रदेश २ का प्रहरी र थुनुवामा संक्रमण बढ्दो

जनकपुरधाम : प्रदेश २ का सुरक्षा निकायमा पनि कोभिड-१९ संक्रमणको दर बढदै गएको छ । प्रदेश प्रहरी कार्यालय जनकपुरधामले दिएको जानकारी अनुसार आइतबार बिहानसम्म कोभिड संक्रमणको दोस्रो लहरमा अहिलेसम्म १९ प्रहरी र ५६ जना थुनुवा संक्रमित भएका छन् ।

महोत्तरी बाहेक प्रदेशका ७ वटै जिल्लाका प्रहरी कर्मचारीमा संक्रमण देखिएको छ भने हिरासतमा रहेका थुनुवाहरु समेत संक्रमण भइरहेको प्रदेश प्रहरी प्रमुख डीआइजी धिरजप्रताप सिंहले दिएको जानकारी दिए । 

---

उनका अनुसार सबैभन्दा बढी बारा जिल्लामा ६ जना प्रहरीमा कोभिड देखिएको छ । त्यस्तै, पर्सामा ५, सर्लाहीमा ३, सिरहामा २ र सप्तरी, धनुषा तथा रौतहटमा एक एक जना प्रहरीमा संक्रमण पुष्टि भएको छ । 

संक्रमितमध्ये पर्साका एक प्रहरी कर्मचारीको अक्सिजन लगाएर उपचार भइरहेको छ भने अन्य जिल्लाका संक्रमित प्रहरी र थुनुवाको अवस्था सामान्य रहेको छ । उनीहरुको सम्बन्धित कार्यालयकै आइसोलेशन कक्षमा उपचार भइरहेको जनाइएको छ ।  

त्यस्तै, प्रदेशमा सबैभन्दा बढी पर्सा प्रहरी कार्यालयमा थुनुवा संक्रमित भएका छन । डिआईजी सिंहका अनुसार पर्सामा ३९ जना, रौतहटमा १०, धनुषामा ५ तथा महोत्तरी र सर्लाही प्रहरीको नियन्त्रणमा रहेका एक एक जना थुनुवा संक्रमित भएका छन । सप्तरी र सिरहाका थुनुवामा पनि संक्रमण देखिएको छ ।

जोखिम भएपनि प्रहरी कर्मचारी सेवाबाट विमुख नहुने भन्दै यसपालिको कोभिड–१९ विरुद्ध आम नागरिकको शान्ति सुरक्षाका लागि प्रहरी कर्मचारी दिनरात खटिरहने उनले बताए ।