वीरगन्ज महानगरमा अक्सिजनसहितको आइसोलेसन सेन्‍टर, खानादेखि उपचारसम्म नि:शुल्क

जनकपुरधाम : वीरगंज महानगरपालिकाले आफ्नै खर्चमा सय बेड अक्सिनसहितको आइसोलेसन कक्ष सञ्चालनमा ल्याएको छ । वडा नम्बर ९ स्थित गोपाल मण्डली धर्मशालामा सय बेड आक्सिजनसहितको २३० बेडको आइसोलेसन कक्ष संचालनमा रहेको महानगरपालिकाका मेयर विजय सरावगीले बताए । अक्सिजनसहितको आइसोलेसनमा खानादेखि उपचारसम्म नि:शुल्क व्यवस्था गरिएको उनले बताए । साथै घरमै रहेका संक्रमितलाई समेत अक्सिजनको व्यवस्था गरिएको उनको भनाइ छ । 

---

‘महामारीमासँग लड्न अस्थायी कोभिड विशेष अस्पताल संचालनमा ल्याएका छौं,’ उनले भने, ‘जसमा अहिले एक सय अक्सिजनसहितको २३० बेडको आइसोलेसन कक्ष निर्माण गरेका छौं, जसमा २ एमडीसहित १० जना चिकित्सक, २१ स्वास्थ्यकर्मी र सफाईकर्मीसहित ४० जना कर्मचारी तथा संक्रमितहरूको सेवाको लागि एम्बुलेन्स २४सै घण्टा खटाएका छौं ।’ 

गम्भीर अवस्था भएका बिरामीलाई नारायणी अस्पताल र नेशनल मेडिकल कलेजमा आफ्नै खर्चमा थप उपचार गराउने व्यवस्था गरेको उनले जानकारी दिए । यसका साथै घर–घरमा गई पीसीआर चेकजाँचका लागि स्वाब संकलन, एक सयभन्दा बढी होम आइसोलेशनमा बसेकाहरूलाई औषधि उपचारदेखि आक्सिजन दिदैं आएको उनले बताए । उनले सशस्त्र प्रहरीको आइसोलेसन कक्षमा २१ वटा आक्सिजन र नारायणी अस्पताललाई चार वटा भेन्टिलेटर दिन लागेको बताए । 

उनले संघ र प्रदेश सरकारले भने सहयोग नगरेको गुनासो गरे । कोभिड महामारीसँग् जुध्न ४ करोड बजेट छुट्याइएको उनले बताए । यतिले पनि नपुगे थप रकमको व्यवस्था गर्ने उनले बताए । ‘पहिलो चरणको महामारीका बेला महानगरपालिकाले ७ करोड रुपैया खर्च गरेको थियो,’ उनले भने, ‘हालसम्म प्रदेश वा संघ सरकारले उपलब्ध गराएको छैन । प्रदेश सरकारलाई पटक–पटक आग्रह गर्दा पनि भुक्तानीसम्म गर्न सकेको छैन । संघ र प्रदेश सरकार सहयोग नगरे पनि भ्याएसम्म विकासको काम पनि नरोकिनेगरी महानगरपालिकाकै बजेटबाट व्यवस्थापन गर्ने प्रयास गर्नेछौं, त्यसले अपुग भएमा आफ्नो निजी खर्च अन्य सहयोगीहरूको मद्दतले व्यवस्थापन गर्नेछौं ।’