८ वर्षपछि पक्राउ परे हत्या आरोपी अन्सारी

जनकपुरधाम : अपहरण गरी हत्या गरेको आरोप लागेका एक व्यक्तिलाई महोत्तरी प्रहरीले ८ वर्षपछि पक्राउ गरेको छ । महोत्तरीको साबिक सुन्दर गाविस-१  र हालको सोनमा गाउँपालिका-८ निवासी पंकज यादवको २०६९ साल चैत ४ गते अपहरण गरी हत्या गरेको आरोप लागेका एकडारा गाउँपालिका-३ भटौलियाका जीवछ अन्सारीलाई प्रहरीले बुधवार जलेश्वर नगरपालिका-३ सीमावर्ती क्षेत्र भिट्ठामोडबाट पक्राउ गरेको हो । जिल्ला प्रहरी कार्यालय महोत्तरीबाट खटिएको प्रहरी टोलीले उनलाई पक्राउ गरेको हो । 

अन्सारीलाई २०७२ साल जेठ १८ गते जिल्ला अदालत महोत्तरीले अपहरण तथा शरीर बन्धक मुद्दामा १७ वर्ष कैद र २ लाख ७५ हजार रुपैया जरिवाना तोकेको थियो । त्यसबेलाबाट खोजीको सूचीमा रहेका अन्सारीलाई थप कारबाहीका लागि अदालतको जिम्मा लगाइने महोत्तरी प्रहरीले जनाएको छ । 

---

धनुषाको सदरमुकाम जनकपुरधाममा डेरा गरी बसेका कक्षा १२ मा अध्ययनरत पंकज यादवलाई २०६९ सालमा अन्सारीको नेतृत्वको समूहले अपहरण गरी फिरौती लिएर हत्या गरेको थियो । घटनामा सिरहा अर्नमाका गणेशकुमार सिंह, धनुषा भरतपुरका कुशेश्वर ठाकुर, सुखवा महेन्द्रनगरका बिकरु भन्‍ने कृष्णाकुमार पुर्वे, राजु सिंह र श्यामा मिश्रासहितको समूहले योजनावध्द रुपले पंकजका बुवा श्यामराय यादवसँग फिरौती लिई हत्या गरेको प्रहरीले बताएको छ । 

घटनामा संलग्‍न बिकरु भन्‍ने कृष्णाकुमार पुर्वे हाल कर्तव्य ज्यान मुद्दामा सर्वस्वसहित जन्मकैद र अपहण तथा शरीर बन्धक मुद्दामा १७ वर्ष कैद र २ लाख ७५ हजार रुपैयाको सजायमा सुनसरी कारागारमा थुनामा छन् । त्यस्तै कुशेश्वर ठाकुर कर्तव्य ज्यान मुद्दामा १२ वर्ष कैद फैसला भएर भिमफेदी कारागारमा छन् । घटनामा संलग्‍न राजु सिंह र श्यामा मिश्राको खोजी जारी रहेको प्रहरी नायब उपरिक्षक प्रकाश विष्टले जानकारी दिए ।