जनकपुरधाम : महोत्तरीको बर्दिबासमा बालिका हत्या घटना प्रकरणले अवस्था तनावग्रत बनेको छ । आक्रोशित स्थानीयले शव राखेर बिहानैदेखि पूर्वपश्चिम राजगमार्ग अवरुद्ध गरी प्रदर्शन गरिरहेको छन् भने प्रहरीका गोली लागेर ३ जना घाइते भएका छन् । त्यस्तै प्रहरीकाे लाठी चार्जबाट आधा दर्जनभन्दा बढी घाइते भएका छन् ।
बर्दिबास नगरपालिका १४ स्थित शुभम् बस्तीकी ६ वर्षीया बालिका गुलाब साह खातनुको बलात्कारपछि हत्या गरिएको आशंकामा स्थानीयले आरोपित युवक २५ वर्षिय अरुणकुमार साहको घर र पसलमा आगो लगाएका छन् ।

स्थानीयले मृतक बालिकको शव सडकमै राखेर बिहानैदेखि पूर्वपश्चिम राजमार्ग अवरुद्ध गरेका छन् । स्थानीयले बलात्कार तथा हत्यामा संलग्न ‘फाँसी देऊ’ भन्दै नाराबाजी गरिरहेका छन् । 

---

यसरी भयो घटना
मंसीर ७ गते आइतवार रातिदेखि शहीद आलमकी छोरी गुलाब बेपता भएकी थिइन् । बालिका बेपता भएको भन्दै अभिभावकले प्रहरीमा उजुरी समेत दर्ता गराए पनि केही पत्ता लाग्न सकेन । 

सोमवार राति पीडित परिवारले थाहा भएपछि आरोपित अरुणलाई गौशलास्थित घरबाट समातेर इलाका प्रहरी कार्यालय गौशालामा बुझाइयो ।
पीडित परिवारले दिएको जाहेरी र आरोपितलाई नियन्त्रणमा लिएपछि गौशाला प्रहरी चौकी र बर्दिबास प्रहरी कार्यालय दुवैले संयुक्त रुपमा घटनाको अनुसन्धान सुरु गरे । 

अरुणले आरोप स्वीकार गरेपछि बालिका गाडिएको स्थलमा जाँदा माटो मुनि बोरामा बाँधिएको अवस्थामा शव बरामद भयो । इलाका प्रहरी कार्यालय गौशालाका प्रमुख प्रहरी निरीक्षक प्रकाश रेग्मीकाअनुसार  बर्दिबासस्थित पसलमा ‘चक्लेट’ किन्न गएकी बालिका गुलाबलाई अरुणले अपहरण गरेर हत्या शव माटोमा गाडेर आफ्नो गाउँ गएको खुलेको छ । तर यसबारे थप अनुसन्धान भइरहेको उनले बताए । 

‘बालिकाको हत्या गरेर फालेको कुरा आरोपितले आफ्नो घरपरिवारमा समेत बताएका रहेछन्,’ रेग्मीले भने , ‘उसको परिवारका सदस्यले नै सोमवार राति १२ बजे प्रहरी कार्यालय गौशालामा ल्याएर बुझाएका थिए ।

इलाका प्रहरी कार्यालय बर्दिबासका प्रहरी नायव उपरीक्षक राजन चापागाईंले पनि पक्राउ परेको अरुणले अपराध स्वीकार गरेको बताए ।  बालिकाको शव भेटिना साथ आक्रोशित स्थानीय शव सडकमै राखेर प्रदर्शनमा उत्रे ।

यसअघि धरौटीमा रिहा
बालिका हत्याका आरोपी अरुणकुमार साह यसअघि पनि हत्या आरोपमा धरौटीमा रिहा भइसकेको रहस्य बाहिरिएको छ । महोत्तरीको इलाका प्रहरी कार्यालय गौशालाका प्रहरी निरीक्षक प्रकाश रेग्मीले आरोपित अरुण यसअघि पनि हत्या आरोपमा पक्राउ परेर अदालतबाट धरौटीमा रिहा भएको बताए । 

उनले भने, ‘लकडाउनको बेला गएको २०७७ वैशाख २८ गत स्थानीय दिलिप ठाकुरको हत्या अभियोगमा पक्राउ गरेको थियो । अनुसन्धानपछि जिल्ला अदालतमा मुद्दा चलाइयो तर उनी धरौटीमा रिहा भए ।’ प्रहरी निरिक्षक रेग्मीका अनुसार दिलीप र अरुणबीच मदिरा सेवन गरी विवाद हुँदा कुटाकुट भएको थियो ।

कुटपिटको क्रममा अरुणले दिलिपमाथि ढुंगा प्रहार गरेपछि मृत्यु भएको थियो । घटना पश्चात आरोपित अरुणलाई पक्राउ गरी कर्तव्य ज्यानको मुद्दा चलाइयो । तर जिल्ला अदालतबाट धरौटीमा रिहा भए । तर उच्च अदालत जनकपुरमा उक्त मुद्दा पुनरावेदन दायर नै छ ।