झारफुक गर्न आएकी युवतीलाई बलात्कार अभियोगमा धर्मगुरु पक्राउ

जनकपुरधाम : बलात्कारको आरोपमा सिरहामा एक मुस्लिम धर्मगुरु पक्राउ परेका छन् । गएको मंगलबार राति सिरहाको लहानमा २३ वर्षीया युवतीलाई बलात्कार गरेको आरोपमा मिर्चैया नगरपालिका १० महेशपुर निवासी मुस्लिम धर्मगुरु ३५ वर्षीय मौलवी मोहम्मद अली हसनलाई प्रहरीले पक्राउ गरेको हो । 

जिल्ला प्रहरी कार्यालय सिरहाका प्रहरी उपरीक्षक उमाशंकर पजियारले दिएको जानकारी अनुसार लहानमा डेरा गरी बस्दै आएका मौलवी हसनले झारफुक गराउन पुगेकी युवतीलाई बलात्कार गरेको उजुरी आधारमा पक्राउ गरिएको हो ।

---

जबरजस्ती करणी मुद्दामा सरकारी वकिल कार्यालयमार्फत बिहीबार जिल्ला अदालतबाट ५ दिनको म्याद लिइ अनुसन्धान प्रक्रियाअघि बढाइएको उनले बताए । 

मंगलबार साँझ लहान नगरपालिका एक मुस्लिम युवती समान्य विरामी परेपछि धर्मगुरुसँग झारफुक गराउन मौलवीका डेरामा पुगेकी थिइन् । मौलवीले युवतीको अभिभावकलाई अलगै राखी आफ्नो कोठामा झारफुक गर्ने भनी लगेका थिए । 

कोठाबाट निस्केपछि युवतीले आफूलाई झारफुकको नाममा बलात्कार गरेको परिवारजनलाई भनेपछि प्रहरीमा मौलवीविरुद्ध उजुरी दिएका थिए । उजुरी परेकै दिन लहान प्रहरीले मौलवी हसनलाई राति करीब १० बजे उनको डेराबाट नियन्त्रणमा लिएको थियो ।