जनकपुर विमानस्थलको नयाँ टर्मिनल भवन सञ्चालनमा

जनकपुरधाम : सम्झौता भएको ८ वर्षपछि जनकपुरधाम विमान स्थलको नयाँ टर्मिनल भवन संचालनमा आएको छ । नयाँ टर्मिनल भवनको निर्माण कार्य सम्पन्न भएपछि मंगलबार संस्कृति, पर्यटन तथा नागरिक उड्ययन मन्त्री योगेश भट्टराई उद्घाटन गरेका हुन् ।

नवनिर्मित अत्याधुनिक टर्मिनल भवनबाट मंगलबारदेखि सेवा सञ्चालन भएको जनकपुर विमानस्थलका प्रमुख किरण गौतमले बताए । नयाँ टर्मिनल भवन सञ्चालनमा आएसँगै यात्रुहरूले भोग्दै आएको समस्याहरू समाधान हुने गौतमले बताए । पुरानो टर्मिनल भवनमा ठाउँको अभावमा भिडभाड हुनेगरेको थियो । नयाँ टर्मिनल भवनको प्रस्थान कक्षमा २ सय ५० यात्रु बस्न सक्ने व्यवस्था मिलाइएको उनले बताए ।

---

१८ करोड रुपैयाँ लागतमा डेढ वर्षमा निर्माण सम्पन्न गर्ने गरी वि.संं. २०६९ सालमा तत्कालीन पर्यटन तथा नागरिक उड्यनमन्त्री पोष्टबहादुर बोगटीले शिलान्यास गरेका थिए । तर निर्माण सम्पन्न हुँदासम्म ४२ करोड खर्च भएको बताइएको छ । 

सात सय यात्रु क्षमताको टर्मिनलमा सीसीटीभी, फायर अलार्म, सञ्चार सेवा, भीआईपी कक्ष र मातृ शिशु स्याहार कक्षसहितको व्यवस्था छ । यसका साथै ३५ जना सुरक्षाकर्मीहरुको लागि आवास गृह, ८० वटा कार र १५० वटा मोटरसाइकलको पार्किङकोसमेत व्यवस्था छ ।

जनकपुरधाममा ५ दशकदेखि नेपाल वायुसेवा निगम सेवा दिँदै आएको छ । १८ जना यात्रु बोक्ने जहाजका लागि २०२४ सालमा निर्माण गरिएको टर्मिनल भवनबाट सेवा दिईँदै आएको थियो । जनकपुरधाम विमानस्थलबाट अहिले दैनिक तीनवटा निजी विमान कम्पनीले सेवा दिँदै आएको छ ।