सप्तरीमा नेपाल र सशस्त्र प्रहरीबीच झडप

राजविराज : सप्तरीमा नेपाल प्रहरी र सशस्त्र प्रहरीबीच झडप भएको छ । बुधवार दिउँसो  सप्तरीस्थित दशगज्जा क्षेत्रमा अनुगमनमा खटिएका सादा पोशाकका नेपाल प्रहरी  र ड्युटीमा रहेका सशस्त्र प्रहरीबीच झडप भएको हो । तिलाठी कोइलाडी गाउँपालिका-१ तिलाठीस्थित दिउँसो सवा ३ बजे तिर सादा पोशाकमा पुगेका नेपाल प्रहरीका जवानले भारतीय बजार कुनौलीबाट सामानसहित आउनेहरूलाई रोकेर चेकजाँच गर्दा विवाद सुरु भएको थियो । 

विवादको क्रममा गाली गलौज, घम्साघम्सी हुँदै हतियार तानातानसम्म भएको प्रत्यक्षदर्शीहरुको भनाइ छ ।  भारतसँग जोडिएका सिमा नाकाहरु ठप्प रहेको वेला सप्तरीस्थित नाकाहरूवाट खुलेआम तस्करी भइरहेको सूचनाको आधारमा जिल्ला प्रहरी कार्यालयवाट अनुगमनका निम्ती सादा पोशाकका टोली परिचालित भएको हो। 

---

झडपमा नेपाल प्रहरीका जवान बढी कुटिएको प्रहरी श्रोतले जनाएको छ । उता, बोर्डर आउट पोष्ट तिलाठीका प्रमुख सशस्त्र प्रहरी निरीक्षक सुशील केसीले दुवै सुरक्षा निकाय बीच ‘मिस-अण्डर स्ट्याण्डिङ्ग’का कारण समान्य सोधपुछ मात्रै भएको विवाद नभएको बताए । 

यता, जिल्ला प्रहरी कार्यालयका डिएपी भुवनेश्‍वरप्रसाद साहले आफू मिटिङ्गमा रहेकोले सो विषयमा जानकारी नभएको बताएका छन् । 'म मिटिङ्गमा व्यस्त भएर सो विषयमा जानकारी भएन । तर दुवै प्रहरी  जवानबीच सामान्य विवाद भएको सुन्‍नमा आएको छ  ।बाँकी वुझ्दैछु, त्यसो भएछ भने दोषीलाई कारवाही हुन्छ,’ उनले भने ।