प्रदेश २ का सचेतकसहित ३ जनाले अस्वीकार गरे ओली समूहको केन्द्रीय सदस्य

जनकपुरधाम : नेकपा ओली समूहले केन्द्रीय सदस्य बनाएका प्रदेश २ का प्रदेशसभा सचेतकसहित तीन जनाले उक्त पद अस्वीकार गरेका छन् । प्रमुख सचेतक सुन्दर विश्वकर्मा, कमलेश झा र कल्याणी चौधरीले ओली समूहले दिएको केन्द्रीय समिति पद अस्वीकार गरेका हुन् ।

नेकपा बारा जिल्ला कमिटीको सचिवसमेत रहेका विश्वकर्मा बारा क्षेत्र नम्बर ४ (क) बाट निर्वाचित भएका थिए । उनले बुधबार प्रेस विज्ञप्ति जारीगरी आफू ओली समूहको केन्द्रीय सदस्य पदमा चयन भएको समाचारप्रति गम्भीर ध्यानाकर्षण भएको भन्दै उक्त पदमा नरहेको जानकारी दिएका थिए । 

---

त्यस्तै नेकपाका प्रदेश सदस्यद्वय कमलेश झा र कल्याणी चौधरीले समेत केन्द्रीय सदस्य पद अस्वीकार गरेका हुन् । झाले पनि एक विज्ञप्ति जारी गरी पद अस्वीकार गरेका छन् भने कल्याणीले सामाजिक सञ्जालमा लेखेर पद अस्वीकार गरेको जानकारी दिएकी छन् । झा नेकपा सर्मथित मजदुरहरूको संगठन नेपाल ट्रेड युनियन महासंघ जिफन्टको प्रदेश कमिटी अध्यक्ष समेत हुन् ।