नेकपा (दाहाल-नेपाल समूह) प्रदेश २ ले आन्दोलन सशक्त बनाउने

जनकपुरधाम : नेकपा दाहाल-नेपाल समूहको प्रदेश २ कमिटीले प्रतिनिधि सभा विघटनविरुध्दको आन्दोलनलाई थप सशक्त बनाउने निर्णय गरेको छ । बिहीबार जनकपुरधाममा बसेको समूहको बैठकले प्रदेशदेखि वडास्तरसम्म विभिन्न संघर्ष समिति गठनगरी आगामी पुस २४/२५ गतेदेखि थप आन्दोलनका कार्यक्रमहरू अघि बढाउने निर्णय गरेको हो । 

बैठकबाट पुस १८ गतेभित्र १ हजार १ सदस्यीय प्रदेश संघर्ष समिति, १ सय १ सदस्यीय प्रदेश स्तरीय सचिवालय समिति, आवश्यकता अनुसार ५ सय १ देखि ६ सय १ सदस्यीय जिल्ला संघर्ष समिति गठन गर्ने निर्णय गरेको छ । त्यस्तै पुस २० गतेसम्म स्थानीय तह स्तरीय र २१ देखि २४ गतेसम्म वडा स्तरीय संघर्ष समिति गठन गर्ने निर्णय गरिएको केन्द्रीय सदस्य श्रीप्रसाद साहले जानकारी दिए ।

---

स्थायी समिति, केन्द्रीय समिति, प्रदेश र जिल्ला स्तरीय सदस्यहरूको उपस्थितिमा भएको बैठकबाट प्रम केपी शर्मा ओलीको प्रतिगमनकारी कदमविरुद्ध पुस २४/२५ गतेदेखि जिल्ला तथा स्थानीय तहबाटआन्दोलनलाई सशक्त बनाउन अन्य दलसँग समन्वय गरेरअघि बढने निर्णयसमेत गरिएको साहले बताए । 

बैठक पश्चात प्रशिक्षण कार्यक्रममा स्थायी कमिटि सदस्य एवं पूर्वमन्त्री गिरिराजमणि पोखरेलले प्रम ओलीको प्रतिगमनकारी कदमलाई परास्त गर्न र हुन सक्ने अर्को प्रतिगमनकारी कदमलाई रोक्न संघर्षलाई सशक्त बनाउन आवश्यकता रहेको बताए ।

पार्टीको विधान र संविधान विपरीत कार्य गरेका प्रम ओलीलाई  ठेकान लगाउन सके मात्र कम्युनिष्ट आन्दोलन सफल हुने उनले बताए । त्यस्तै स्थायी कमिटी सदस्य एवं पूर्वमन्त्री मातृका यादवले ओली प्रवृतिलाई परास्त गर्न संघर्षका कदमहरूलाई शसक्त बनाउनै बताए । नेकपाको विभाजित समूहमा प्रदेश २ का ४ जना स्थायी समिति सदस्य मध्ये ३ जना दाहाल–नेपाल समूहमा र एकजना ओली समूहमा छन् ।

त्यस्तै केन्द्रीय सदस्यतर्फ ६८ जना मध्ये ४५ जना दाहाल नेपाल र १९ जना ओली समूहमा रहेका छन भने ४ जना अन्यौलमा रहेका छन । प्रदेश कमिटी सदस्यतर्फ २ सय १४ जना मध्ये १ सय ३४ जना दाहाल नेपाल समूहमा र ६८ जना ओली समूहमा रहेका छन भने १२ जना अन्यौल्यमा छन ।

प्रदेश सभा सदस्य शत्रुध्न महतोले जनाए अनुसार प्रदेश सभा सदस्यतर्फ ३२ जना मध्ये २० जना दाहाल नेपाल समूहमा र ९ जना ओली समूहमा गएका छन भने दिलिप साह, लगनलाल चौधरी र अनिता यादव सहितका ३ जना अन्यौलमा रहेको छ ।