प्रहरी प्रशासनकै संरक्षणमा भीडभाड

जनकपुरधाम : सरकारले कोभिड-१९ महामारीलाई दृष्टिगत गर्दै दसैं अवधिभर शक्तिपीठ र पूजास्थलमा भीडभाड नगर्न निर्देशन दिएको छ । तर, प्रदेश २ कै राजधानीमा यो निर्देशनको बेवास्ता भइरहेको देखिन्छ ।

शनिबार महाप्रसाद जनकपुरधामास्थित विभिन्न शक्तिपीठहरूमा अन्य दिनभन्दा दोब्बर/तेब्बर भीड देखिन्छ। शुक्रबार रातिदेखि नै प्रसाद चढाउनेहरु लाइनमा लागेका छन्।

---

शुक्रबार पनि प्रहरीको सुरक्षामा फूलपाती भित्र्याउनेको भीड देखिएको थियो । कोभिड जोखिमको बेवास्ता गर्दै आयोजक समितिले हजारौंको संख्यामा देखिएको भीडलाई नगरभरी घुमाएको थियो । सो कार्यक्रममा नेपाल प्रहरी, सशस्त्र प्रहरी, नेपाली सेना र विभिन्न विशिष्ट व्यक्तिहरुको उपस्थिति रहेको थियो ।

प्रहरीकै सुरक्षामा मानिसहरुले ठूलो भीड जम्मा गरिरेहका यो पहिलो घटना भने होइन । जनकपुरधामस्थित आदिशक्ति स्वरुपा राजदेविसहित विभिन्न शक्तिपीठहरुमा भीड देखिन्छ । खोंइच भर्ने र प्रसाद चढाउने कार्यमा प्रहरीकै सुरक्षामा कोरोनालाई चुनौती दिँदै दिनहुँ ठूलो भीडभाड हुन्छ ।

नेपाल सरकारको निर्देशन बमोजिम स्थानीय प्रशासनद्वारा दसैंको अवसरमा हुने राजदेवी मन्दिरसहितका विभिन्न शक्तिपीठ भीडभाड हुने खालका बोकाबलि प्रदान, महाप्रसाद चढाउने र खोंइच भडाईलगायतका कार्यमा रोक लगाइएको छ । तर, भक्तजनले धार्मिक आस्थाको नाम दिँदै ती निर्देशनलाई अवज्ञा गरेर राजदेवी मन्दिर सहितका शक्तिपीठहरुमा भीडभाड गर्दै आएका छन ।

स्थानीय प्रशासनले त्यसलाई रोक्नुको सट्टा शान्ति सुरक्षाको नाममा संरक्षण गर्दै आएको छ । राजदेवी मन्दिरमा पूजा व्यवस्थापक महावीर युवा कमिटीले स्थानीय प्रशासनको निर्देशनलाई लत्याउँदै मन्दिर परिसरमा प्रत्येक दिन राति ३-४ सयौंको भीड जम्मा गरी नाचगानसहितको रंगारंग कार्यक्रम आयोजना गर्दै आएका छन् । तर, स्थानीय प्रहरी त्यसलाई रोक्नुको सट्टा श्रद्धालुको आस्थालाई ठेस नपुर्याउने गरी शान्ति सुरक्षामा लागेको प्रतिक्रिया दिँदै आएका छन् ।

धनुषाका प्रहरी प्रवक्ता डिएसपी मकेन्द्र मिश्रले आफूहरु भीडभाड हुन नदिने प्रयासमा रहेकाे बताउँछन् । उनका अनुसार श्रद्धालुको आस्था प्रहरीको केही लाग्न सकेको छैन ।