धनुषामा एक मदिरा उद्योगीको हत्या, चारजना पक्राउ

जनकपुरधाम : धनुषामा एक मदिरा उद्योगीको हत्या भएको छ । प्रहरीकाअनुसार क्षिरेश्वरनाथ नगरपालिका–७ महेन्द्रनगरस्थित क्षिरेश्वर डिष्ट्रिलरी इन्डस्ट्रिजका सञ्‍चालक त्रियुगा नगरपालिका–७ चुओर निवासी ५१ वर्षीय प्रमोद रेग्मीको हत्या भएको हो ।

बुधबार बिहान आफ्नो घरबाट उद्योग आएका रेग्मीको शव रक्ताम्य अवस्थामा बिहीबार बिहान फेला परेको प्रहरीले जनाएको छ । प्रहरीकाअनुसार टाउकोमा गहिरो चोट लागेको र शरीरबाट अत्यधिक रगत बगेको अवस्थामा रेग्मीको शव फेला परेको छ ।

---

रेग्मीका आफन्त विनोद पाण्डेकाअनुसार हिजो साँझ उद्योगमै मदिरा सेवन गरेपछि राति करीब १० बजे छोराछोरीसँग फोनमा कुराकानीसमेत गरेका थिए । बिहान उनी मृत अवस्थामा फेला परेका हुन् ।

ईलाका प्रहरी कार्यालय महेन्द्रनगरका अनुसार रेग्मीको टाउकोमा घाउ देखिएको छ । ईप्रका प्रमुख दिपक रायले शवको प्रकृति हेर्दा हत्या भएको देखिए पनि घटना शंकास्पद रहेको बताए । प्रहरीले शवलाई पोष्टमार्टमका लागि प्रादेशिक अस्पतालमा पठाइएको छ । घटना बारे अनुसन्धानका क्रममा चार जनालाई प्रहरीले नियन्त्रणमा लिएको उनले बताए । 

रेग्मीसहित चारजना मिलेर महेन्द्रनगरमा डिष्ट्रिलरी सञ्‍चालन गरेका छन् । उनी डिष्टिलरीका निर्देशकको रुपमा काम गर्दै आएका थिए ।