तीन वर्षमा पनि टुंगिएन प्रदेश २ को नाम र राजधानी

जनकपुरधाम : प्रदेश सभा गठन भएको तीन वर्ष पुगे पनि प्रदेश २ को नामाकरण र स्‍थायी राजधानीको विषय अझै टुंगिएको छैन । पछिल्लो पटक चैतमा नाम र राजधानीको विषय टुंग्याउन निर्वाचनसमेत गरिएको थियो । तर नाम र राजधानीका विषयमा प्रदेश सभामा दुई तिहाइ मत नपुगेपछि असफल भयो । 

प्रदेश सभामा नामाकरणका लागि ४ र राजधानीका लागि ३ प्रस्ताव गरिएकोमा कुनै पनि पक्षले दुई तिहाइ मत ल्याउन सकेन । राजधानी जनकपुरधामका लागि विशेष अध्ययन समितिबाट सर्वसम्मति भए पनि मतदानमा अस्वीकृत भएको थियो ।

---

प्रदेशको नामाकरणका लागि मतदानमा सत्तापक्ष मधेस केन्‍द्रित दलहरूबाट ‘मधेस प्रदेश’ नाम प्रस्तावित गरिएको थियो भने कांग्रेस र सत्तारुढ दलको केही सांसदहरूले ‘मध्य मधेस प्रदेश’, नेपाली कांग्रेसको ‘मिथिला भोजपुरा प्रदेश’ र नेकपाको ‘जानकी प्रदेश’बहुमतले अस्वीकृत भएको थियो ।

राजधानीका लागि सत्तारुढ दल र प्रतिपक्षी दलबीच जनकपुरधाम राख्‍ने सहमति भए पनि सतारुढ दलले प्रदेशको नाम मधेश प्रदेशमा अडान राखेपछि बहुमत पुगेको थिएन । कुल १०७ सदस्य मध्ये दुईतिहाइका लागि ७२ मत आउनुपर्नेमा कुनै पनि प्रस्तावले बहुमत प्राप्त गर्न सकेको थिएन ।

हुनत नाम र राजधानीको विषयमा टुंगो लगाउन प्रदेश २ सरकारले सुरुवातमा डा. हरिवंश झाको संयोजकत्वमा ३ सदस्यीय संवाद तथा सुझाव आयोगसमेत गठन गरेको थियो । आयोगले प्रदेश २ का आठै जिल्लामा कार्यक्रमगरी जनस्तरबाट सुझाव संकलन गरेर सरकारलाई २०७३ वैशाख १९ गते  प्रतिवेदन बुझाएको थियो ।

प्रदेशको नाम मधेस प्रदेश राख‍्‍न ७० प्रतिशत जनताले सुझाव दिएका थिए । समितिले स्थायी राजधानी जनकपुरधामलाई नै कायम गर्न ८० प्रतिशत जनसमर्थन जुटाएको थियो । तर प्रदेश सरकारले कार्यान्वयनमा ल्‍याउन सकेन ।

आयोगले जनताबाट दुई तिहाइभन्दा पनि बढी समर्थन जुटाउँदा पनि मतदानको क्रममा दलीय कारणले बहुमत ल्याउन नसक्नु प्रदेश सरकारको कमजोरी भएको समितका सदस्‍यहरू बताउँछन् । हुनत राजधानी जनकपुरधाम राख्‍नेमा आन्तरिक सहमति प्रदेश सरकारले जुटाइसकेको थियो ।

दुई तिहाइ बहुमतको आभावमा प्रदेशको नाम र राजधानी हालसम्म टुंगो लाग्‍न नसकेको सरकारका प्रवक्ता आन्तरिक मामिला तथा कानून मन्त्री ज्ञानेन्द्र यादव बताउँछन् । 'सत्तारुढ दलसँग दुई तिहाइ बहुत नभएको कारण अहिलेसम्म ढिलाई भइरहेको उनको भनाइ छ ।  

तर अन्य दलसँग समन्वय र सहकार्य भइरहेको कारण आगामी केही दिनमै प्रदेशको नाम मधेश प्रदेश र राजधानी जनकपुरधाम राख्‍नेगरी सरकारले टुंगो लगाउने उनले दाबी गरे । प्रदेश २ मा सत्तारुढ जसपाको ५६, कांग्रेसको १९ र नेकपाको ओली समूहको १२ र प्रचण्ड नेपाल समूहको २० जना सांसद रहेका छन् ।